Maria Nólsoy framúrskarandi í fyrsta kappingardystinum í København

Í summar skifti Maria Pálsdóttir Nólsoy Horsens út við København fyri at taka næsta fetið á hondbóltsleiðini. Mikukvøldið kom hon brestandi inn á hondbóltspallin í danska høvuðsstaðnum.

Hoyr eisini: Maria Nólsoy: København á mangan hátt rætta valið

22-ára gamli føroyski landsliðsspælarin var stóri profilurin í 30-29 sigrinum hjá København. Bakspælarin, við uppvøkstri í Neistanum, varð kosin dagsins spælari eftir dystin móti Sønderjyske í 1. umfari í bestu donsku kvinnudeildini.

Hetta var eftir sjey mál og seks upplegg - bæði flest á vøllinum. Maria Nólsoy hevði fleri góð gjøgnumbrot, fekk spælið hjá København at koyra, vann eitt brotskast og gjørdi so at siga ikki tekniskar villur.

Sí øll tølini her

Maria, her undir HM-endaspælinum í Týsklandi, var so at siga ikki at steðga hjá Sønderjyske í gjár (Mynd: Sverri Egholm)

Maria varð avgerandi á Frederiksberg. Eftir frálíkan fyrra hálvleik var København á odda 17-10, men Sønderjyske át seg inn eftir stegðin. Seinastu seks minuttirnar var munurin tríggjar ferðir bert eitt mál, men føroyinturin á vøllinum legði upp til eitt mál og skoraði tvey mál.

Maria Páldóttir Nólsoy skoraði seinasta málið í dystinum, til 30-29, bæði stigini vórðu verandi í Keypmannahavn.

Í Jútlandi vunnu Jana Mittún og Viborg greitt á gamla liðnum hjá Mariu, Horsens. Hetta varð ikki størsti hatgalsdysturin hjá Janu, men hon varð skrásett fyri tvey mál, eitt upplegg og eitt vunnið brotskast í 33-21 sigrinum

Rakul Wardum spældi stóran dyst, tá Skanderborg tapti fyri Maritu Mortensen og NFH. Meira um tað seinni