Sera væl nøgd við ítróttardagin í Klaksvík

Í gjár, 15. juli, skipaðu tilflytarar saman við integratiónsnevndini í Klaksvík fyri ítróttardegi í Klaksvík.

Á skránni á degnum, sum serliga var ætlaður tilflytarum og familjum teirra, vóru m.a. kappingar í kurvabólti, flogbólti, badminton og borðtennis. Eisini vóru fleiri stuttligar kappingar á skránni.

Sambært Klaksvíkar kommunu vóru eini 100 til 150 luttakarar á degnum.

– Øll vóru sera væl nøgd við dagin og luttóku eini 100 til 150 á degnum, har summi eisini vóru komin at heppa á teirra lið. Serliga var tað kurvabóltur, sum hevði stóran áhuga millum áskoðararnar.

Hetta var triðju ferð, at skipað varð fyri einum slíkum tiltaki fyri tilflytarar, so helst er árligi ítróttardagurin fyri tilflytarar komin fyri at verða, skrivar Klaksvíkar kommuna.