Fleyr og Mjølnir vunnu - TB og KÍF taptu

Hotel Djurhuus-deildin:

Fleyr – TB 3-1 (25-23, 25-10, 16-25, 25/19)

Við 3-1 sigri á TB í gjár tykist Fleyr fyribils at vera komið úr aldudalinum, tær vóru í, men næsta leygardag fáa vit at síggja, um Fleyr veruliga er komið fyri seg, tá ið oddadystur verður millum SÍ og Fleyr í Sørvági.

Í dystinum ímóti TB í gjár tóktist fyrsta settið at vera komið undir land, tá ið Fleyr legði seg á odda 20-10, men við at vinna 10 av teimum næstu 12 stigunum meldaði TB seg innaftur í dystin, og var líka við at javna til 24-24, men eftir at TB hevði yvirlivað tríggjar settbóltar, eydnaðist Fleyr loksins at vinna tann fjórða og settið 25-23, tá ið servan hjá TB fór út av baklinjuni.

Góða gongdin hjá TB stóð ikki við í øðrum setti, sum í roynd og veru varð avgjørt, tá ið Fleyr vann átta stig upp í slag og fór framum 18-6 fyri síðan at vinna settið 25-10.

Men við eitt vaknaði TB og smurdi Fleyr av 25-16 í triðja setti, og bjóðaði eisini av fyrstu løtuna í fjórða setti, men miðskeiðis í settinum tók Fleyr seg eini fýra, fimm stig framum, sum var munurin restina av settinum, sum Fleyr vann 25-19.

Mjølnir – KÍF 3-1 (25-13, 20-25, 25-14, 25-17)

Eftir at hava tapt fyri Fleyr í fyrsta dystinum í kappingini, hevur gingið sum eftir ánni hjá Mjølni, sum í gjár vann sín fimta sigur á rað, eftir at KÍF var sent suðuraftur til Kollafjarðar við 3-1 tapi í ferðaskjáttuni.

Ein av trupulleikunum hjá KÍF vóru tær longu røðirnar av stigatapum, sum vóru heilt upp í 10 stig, og tá vinnur tú ikki flogbóltsdystir.

Soleiðis fór Mjølnir í einum frá 4-3 til 11-3 í fyrsta setti, og síðani frá 11-5 til 16-5, og tá vendist ikki aftur.

Eftir at KÍF hevði svarað aftur og vunnið annað sett 25-20, sá bjartari út hjá teimum, tá tær fóru framum 10-7, men eftir javnleik 12-12 vann Mjølnir 10! stig í einum háli, so støðan gjørdist 22-12, áðrenn Mjølnir vann settið 25-14.

Í fjórða setti fór Mjølnir skjótt fýra framum, og tann munurin bara vaks, til Mjølnir hevði vunnið 25-17.

Um eina viku verður toppdystur ímillum nr. 1 SÍ og nr. 2 Fleyr. Tá spælir Mjølnir ímóti Drátti og kann taka annaðplássið á stigatalvuni, um úrslitið lagar seg rætt.

Kl. 18 í dag møtast toppur og botnur á Giljanesi, tá Dráttur tekur ímóti SÍ.

Støðan í Hotel Djurhuus-deildini: