Annað

FM í kvik- og snartalvi um vikuskiftið

Tað verður telvað við fullari ferð á Toftum hetta vikuskiftið. Føroyameistararnir í kviktalvi og snartalvi skulu finnast.

Hesir tríggir vóru bestir í snarkappingini í fjør - f.v.: Høgni Egilstoft Nielsen, Helgi Dam Ziska og Luitjen Akselsson Apol

Hesir tríggir vóru bestir í snarkappingini í fjør - f.v.: Høgni Egilstoft Nielsen, Helgi Dam Ziska og Luitjen Akselsson Apol

2025-11-29 12:48 Author image
Innsent
placeholder

Í dag, leygardagin er snarkappingin á skránni, og sunnudagin verður kappast í kviktalvi.

Allir fimm á landsliðnum, sum fyri viku síðani vunnu smálandakappingina á Kýprós - Helgi Dam Ziska, Høgni Egilstoft Nielsen, Luitjen Akselsson Apol, Jón í Horni Nielsen og Elias Petersen - eru við í kappingini á Toftum.

26 telvarar fara at kappast í snartalvi í dag, og tretivu verða í kvikkappingini í morgin.

Peningavirðislønir verða latnar trimum teimum bestu umframt nakrar serstakar ratingvirðislønir fyri lutfalsliga bestu avrikini.

Tað er Tofta Talvfelag, sum hýsir kappingini, og telvað verður í Talvhúsinum í bygdini. Byrjað verður klokkan 13:30 báðar dagarnar.

Snar og kvik

Snarkappingin er tann, tá at kalla hvør leikur skal flytast í skundi. Hvør telvari fær tríggjar minuttir í part til talvið umframt tvey sekund, sum løgd verða aftrat fyri hvønn fluttan leik.

Í morgin, sunnudagin er tað so kvikkappingin. Tá fær hvør telvari tíggju minuttir í part umframt tvey sekund fyri hvønn fluttan leik. Sunnudagin eru níggju umfør.

Í Føroyum hevur dúgliga verið telvað snartalv. Tað plagdi at vera fimm minuttir í part. Talvklokkurnar vóru ikki so framkomnar fyrr, at til bar at fáa sekund framíhjá fyri hvønn fluttan leik sum nú.

Kviktelvingin er nýggjari enn snarkappingin sum reglulig FM-kapping. FM í snartalvi - á enskum blitz - hevur verið síðani 1980, men kviktelving - á enskum rapid chess - hevur bara sjey ár á baki í Føroyum í FM-høpi.


Helgi og Høgni

Tað eru tveir favorittar bæði í dag og í morgin. Stórmeistarin Helgi Dam Ziska og altjóða meistarin Høgni Egilstoft Nielsen.

Helgi er stóri snarmeistarin, Høgni hevur afturímóti vunnið kvikkappingina seinastu tvey árini - í fjør eftir dramatiskan umdyst móti Helga. Avgerðin fell ikki fyrr enn í Armageddon-umtalvinum.

Í dag, leygardagin eru teir fimm á landsliðnum høvuðsfavorittar, men sunnudagin leggjast nakrir aftrat, sum kunnu gera seg galdandi, nevnast kunnu tríggir fyrrverandi føroyameistarar; Carl Eli Samuelsen, Eyðun Nolsøe og Rani Nolsøe.

Sagt verður, at undirhaldsvirðið er eitt annað í talvi, tá flutt verður kvikliga, serliga hjá teimum, sum fylgja við, so her er kanska eitt gylt høvi hjá áhugaðum at støkka inn á gólvið í Talvhúsinum á Toftum hetta vikuskiftið at forvitnast, meðan telvað verður.

Niðanfyri sæst yvirlit yvir teir, sum vunnið hava FM í ávikavist snartalvi og kviktalvi.


FM í snartalvi (1980-2024)

1980 Bjarki Ziska, HT
1981 Súni Ziska, HT
1982 Bjarki Ziska, HT
1983 Andrias Ziska, HT
1984 Jens Chr. Hansen, TT
1985 Bogi Ziska, STF
1986 Torkil Nielsen, ST
1987 Leif Kristensen, GT
1988 Heini Olsen, KTF
1989 Heini Olsen, KTF
1990 Steintór Rasmussen, KTF
1991 Heini Olsen, KTF
1992 Heini Olsen, KTF
1993 Heini Danielsen, HT
1994 Ólavur Simonsen, KTF
1995 Martin Brekká, TFS
1996 Torbjørn Thomsen, KT
1997 Carl Eli N. Samuelsen, VT
1998 John Rødgaard, VT
1999 Eyðun Nolsøe, KTF
2000 Finnbjørn Vang, KTF
2001 John Rødgaard, VT
2002 John Rødgaard, VT
2003 John Rødgaard, VT
2004 Helgi Dam Ziska, HT
2005 Helgi Dam Ziska, HT
2006 Helgi Dam Ziska, HT
2007 Helgi Dam Ziska, HT
2008 Helgi Dam Ziska, HT
2009 Helgi Dam Ziska, HT
2010 Helgi Dam Ziska, HT
2011 Helgi Dam Ziska, HT
2012 John Rødgaard, VT
2013 Helgi Dam Ziska, HT
2014 Helgi Dam Ziska, HT
2015 Helgi Dam Ziska, HT
2016 Helgi Dam Ziska, HT
2017 Helgi Dam Ziska, HT
2018 Rógvi Egilstoft Nielsen, ST
2019 Helgi Dam Ziska, HT
2020 Helgi Dam Ziska, HT
2021 Helgi Dam Ziska, HT
2022 Helgi Dam Ziska, HT
2023 Rógvi Egilstoft, ST
2024 Helgi Dam Ziska, HT


FM í kviktalvi (2019-2024)

2019 Høgni Egilstoft Nielsen, ST
2020 Helgi Dam Ziska, HT
2021 Helgi Dam Ziska, HT
2022 Helgi Dam Ziska, HT
2023 Høgni Egilstoft Nielsen, ST
2024 Høgni Egilstoft Nielsen, ST

Talvsamband Føroya

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder