Jákup Petur var nógv fyrstur niðan á Sornfelli

Annan páskadag skipaði Tórshavnar Súkklufelag aftur fyri súkklukapping. Hesa ferð í tíðarkoyring. Teinurin gekk frá Auto Service, eftir Oyggjarvegnum og niðan á Sornfelli. Ein teinur á góðar 17 kilometrar.

Jákup Petur Eliassen vann kappingina leygardagin til Saksunar og niðan á Eiðisskarð, og aftur annan páskadag.

Hesaferð var Jákup Petur bara seks sekund frá metinum á hesum teini. Og tað má metast sum rættiliga gott, tá hugsað verður um, at hann stríðis við einum skaða í tjúkkanum, og at bakbremsan tók í alla tíðina.

- Vegna skaðan eg nú stríðist við, so mátti eg koyra taktiskt. Eg mátti spara meg niðan eftir, og so koyra alt eg átti millum Kleynisvarða og harða teinin niðan á Sornfelli. Taktikkurin eydnaðist, segði ein fegin Jákup Petur við heimasíðuna hjá Tórshavnar Súkklufelag eftir kappingina.

Hilmar Hansen var somuleiðis væl koyrandi, og hann kom á mál góðar tveir minuttir eftir Jákup Petur. Nummar trý hjá monnum gjørdist Casper Rosen. 

Súsanna Skylv gjørdist vinnari hjá kvinnum, og eins og Jákup Petur, so var hon sera væl koyrandi. Hon koyrdi teir 17 kilometrarnar uppá 48 minuttir reint, og brúkti tá bert tvey sekund meira um teinin enn nummar tvey hjá monnum. Sera gott koyrt, og verður hugt eftir strekkjunum hvør sær, so koyrdi hon næst skjótastu tíð frá landsvegnum og teir hálvan fjórða kilometurin niðan á Sornfelli. Hetta er bert 20 sekund seinni enn vinnarin.

Úrslit, Auto Service - Sornfelli, 17 km, menn:
1. Jákup Petur Eliasen, 45 minuttir 52 sekund
2. Hilmar Hansen, 47:58
3. Casper Rosen, 53:42

Úrslit, Auto Service - Sornfelli, 17 km, kvinnur:
1. Súsanna Skylv, 48 minuttir
2. Adél Gyepes, 1 tími 11 minuttir 34 sekund
3. Anita Johannesen, 1:11:51