Jana og Viborg vunnu seg í Final4

Nú er greitt, at Jana Mittún og Viborg annað árið á rað skulu spæla Final4 millum jól og nýggjár, tá hálvfinalurnar og steypafinalan verða spældar í Odense.

Viborg HK vann sær pláss í Final4 við 31-27 sigri á heimavølli móti Ikast Håndbold, har føroyski landsliðsvenjarin, Claus Mogensen, er venjari.

Tað var 14-13 til Viborg eftir fyrra hálvleik í fjórðingsfinaluni. Eftir steðgin fóru tær í grønum frá.

Jana Mittún skeyt tvey mál, legði upp til trý, vann eitt brotskast og stýrdi serliga eftir steðgin spælinum væl. Tað var eisini í avgerandi løtum, at føroyski profilurin skoraði.

(Mynd: Johnny Pedersen/Ritzau Scanpix)

Claus Mogensen og tær í Ikast iðra seg um mista hálvfinaluplássið (Mynd: Johnny Pedersen/Ritzau Scanpix)

Fyrr í kvøld spældu Maria Pálsdóttir Nólsoy og København Håndbold móti Esbjerg, og tað eydnaðist akkurát ikki at vinna á favorittunum. Esbjerg vann 32-31 við brotskasti móti endanum, sum Nora Mørk setti í netið. Tað var 18-13 til København í steðginum.

Maria Nólsoy stóð annars fyri góðum avriki við millum annað fimm uppleggum og tveimum málum.

Sønderjyske og Odense Håndbold vunnu seg í gjár í Final4.

Eftir dystin var lutakast um hvussu spælt verður í Final4, og her fekk Viborg eitt gott lutakast, og sleppur undan bæði Esbjerg og Odense. Mótstøðulið í hálvfinaluni verður Sønderjyske, og har má Viborg metast at vera favorittur.

Jana Mittún spælir við Viborg hetta kappingarárið afturat, og fer síðani til Nykøbing Falster at spæla.