Heidi Sevdal best í august

Til fyrru hálvfinalunar í steypakappingini hjá kvinnum, sum blivu spældar hóskvøldið, bleiv Heidi Sevdal úr NSÍ heiðrað, sum besti spælari í Betri deildini hjá kvinnum í august mánað.

Tað eru venjarar og miðlafólk, sum hvønn mánað atkvøða um besta leikara, og heiðurin verður latin í samstarvi við FSF, EFFO og Betri. Aftur hendan mánaðin, var tað ein leikari hjá NSÍ, sum fór avstað við heiðrinum.

Í samrøðu við FSF greiðir Heidi Sevdal frá, at hon ikki beinleiðis hevði sæð tað komið, at hon skuldi fara avstað við heiðrinum, men samstundis heldur hon, at lið hennara hevur avrikað væl seinastu tíðina, og er í einum góðum stima, og tí heldur hon tað vera uppiborðið, at tað aftur hesaferð var ein NSÍ’ari sum fór avstað við heiðrinum. Eisini nevnir hon m.a. Tefa (Stefani Cabral), sum ein leikara, sum kundi verið um boðið, líka so væl sum at tað eisini kundi verið leikarar úr øðrum feløgum.

Til seinast leggur toppskjútin afturat, at fyri hana er tað sjávsagt mest umráðandi, at hópurin avrikar væl, men ein slíkur heiður kennist sjálvandi væl, og hon tekur tað sum eitt persónligt herðaklapp, at tað er júst hon, sum fekk heiðurin hesaferð. Nógv mál og fleiri avgerandi mál, væntar høvuðspersónurin er ímillum orsøkirnar til, at hon hevur vunnið.

Umframt heiðurin, fær Heidi Sevdal eina glasstandmynd, latin av Betri og eitt gávubræv á 1.500kr frá EFFO. Tað var John Mikkelsen, nevndarlimur í NSÍ, sum stóð fyri handanini.

NSÍ var á vitjan hjá KÍ í Klaksvík til fyrru hálvfinaluna, og við einum 1-0 sigri, má sigast at NSÍ hevur eitt fínt útgangsstøði til seinnu hálvfinalurnar, sum verða leiktar leygardagin 1. oktober.