Maguire er skaddur - Grealish fingið krakk

Kemur tað heim ella ikki? Hetta er stóri spurningurin um enska landsliðið, nú bert ein vika er til EM-endaspælið. Ongland fer til Týsklands sum størsti favoritturin hjá fleiri veddingarfyritøkum, og hetta er ein óvand støða.

Gamaní er tað fótbóltsins heimland, og tað hvílir eitt ávíst trýst á Onglandi undan øllum endaspølum. Hesaferð er tað øðrvísi: Kane, Bellingham, Foden, Saka, Rice, Walker og nógvir aðrir sterkir spælarar bera boð um ein hóp í heimsflokki. Ongland var eisini í HM-hálvfinaluni í 2018 - við veikari hópi - og í EM-finaluni fyri tveimum árum síðani. Hini stóru londini síggja heldur ikki út til at vera nær sínum tindi.

Gareth Southgate hevur verið noyddir at skorið niður í hópinum, sum allir aðrir venjarar. Jordan Henderson hevur verið lyklaspælari á landsliðnum í nógv ár, men hann og Marcus Rashford sluppu ikki eingongd við í bruttohópin.

Tað gjørdu álopskendir profilar sum James Maddison og Jack Grealish, men nú 26-mans hópurin skuldi kunngerast, vórðu teir sáldaðir frá. Maddison hevur verið skaðadarvaður, og Grealish hevði ikki eitt gott kappingarár við City.

Størsti trupulleikin hjá Southgate er, at hann noyðist at vera Harry Maguire fyriuttan. Ymiskar meiningar eru um Manchester United-miðverjan, men hann og Stones hava sum heild staðið sterkir í myndini í verjuni hjá landsliðnum. Maguire hevur tó so stórar trupulleikar í tjúkkanum, at mett verður at hann ikki fær spælt nakran serligan leiklut.

Ein avloysari skal finnast. Sum tað sæst á hópinum hevur Ongland eisini nógvar ungar og spennandi spælarar á so at siga øllum plássum.

Endaligi EM-hópurin hjá Onglandi

Málverjar: Jordan Pickford (Everton), Dean Henderson (Crystal Palace), Aaron Ramsdale (Arsenal).

Verjuspælarar: Lewis Dunk (Brighton), Joe Gomez (Liverpool), Marc Guehi (Crystal Palace), Ezri Konsa (Aston Villa), Luke Shaw (Man Utd), John Stones (Manchester City), Kieran Trippier (Newcastle), Kyle Walker (Manchester City).

Miðvallarar: Trent Alexander-Arnold (Liverpool), Conor Gallagher (Chelsea), Kobbie Mainoo (Manchester United), Declan Rice (Arsenal), Adam Wharton (Crystal Palace).

Áleyparar og kantar: Jude Bellingham (Real Madrid), Jarrod Bowen (West Ham), Eberechi Eze (Crystal Palace), Phil Foden (Manchester City), Anthony Gordon (Newcastle), Harry Kane (Bayern München), Cole Palmer (Chelsea), Bukayo Saka (Arsenal), Ivan Toney (Brentford), Ollie Watkins (Aston Villa)

Ongland er í bólki saman við Serbia, Danmark og Slovenia. Fyrsti dysturin er 16. juni móti Serbia.