Noah Mneney hevur brotið beinið

HB vann í gjár sætta sigurin á rað, tá B68 var á vitjan. Men 2-0 sigurin hevði eisini ein skugga yvir sær.

Eftir tíggju minuttir kom Sebastian Lau Nielsen alt ov ógvulislga inn í ein nærdyst á miðjum vølli. Takklingin var vemmilig, og danin rakti Noah Mneney á aftara beinið.

Tað sást beinanvegin, at talan var um álvarsaman skaða, og í røntguni á Landssjúkrahúsinum var eingin ivi: Har sást eitt brot í høgra beininum, og tað var sum skilst við skinnabeinið/undir knænum hjá 23-ára gamla miðvallaranum.

Landsliðið hevur fýra dystir síðst i september/fyrst í oktober. Tað er ikki serlgia sannlíkt, at Noah verður tøkur tá (Mynd: Sverri Egholm)

Ilt er at siga, júst hvussu leingi Noah Mneney skal sita uttanfyri. Tað veldst millum annað um, hvussu beinið veksur saman.

Men nakrar mánaðir skal man mest sannlíkt rokna við, og harvið er ilt at ímynda sær, at Noah Mneney spælir aftur í 2026. Seinasta umfar í Meistaradeildini er 31. oktober - landsliðið, sum fuglfirðingurin vanliga er við, spælir seinastu dystirnar mitt í november.

Tó kann miðvallaramotorurin vera heppin og fáa okkurt við seint í heyst.

Talan er um stóran smeitur fyri HB næstu tíðina. Noah Mneney hevur aftur í ár víst støðufesti og styrki á sentrala miðvøllinum og verið týðandi brikkur í góðu gongdini seinastu tíðina.

Eiler Rasmussen ivaðist annars ikki í støðuni. Dómarin gav Sebastian Lau Nielsen reyða kortið, og atgerðin fer at kosta nakrar dystir. Fyrst og fremst botnbrakið móti Skála sunnudagin.