Elias á Skipagøtu við í nógvum málum í 1. umfari

Elias Ellefsen á Skipagøtu hevur havt stóran leiklut og sæð lívligur út í teimum báðum fyrstu kappingardystunum hjá Kiel. Sunnudagin rakk tað ikki til steyp í stórsteyadystinum - millum annað tí Elias brendi í brotskastskappingini móti Hákuni West av Teigum Berlin

Nummar 71 gjørdist tó janvsettur toppskjútti við Mathias Gidsel í týska Super Cup-dystinum, og í kvøld rukku avrikið hjá honum Kiel til tvey stig í 1. umfari í Bundesliguni.

Hetta var í Erlangen, har THW Kiel varð nakað kroyst í 1. hálvleiki. Støðan í steðginum var 13-12 til Erlangen. Spælið hjá gestunum var heldur merkt av tekniskum villum - Elias á Skipagøtu átti nakrar av hesum  - og vantandi bjargingum. 

Andreas Wolff kom ongantíð av álvara í gongd í málinum í kvøld, men fyrstu tíggju minuttirnar eftir steðgin vendi Kiel støðuni: Frá 13-12 til 16-21. Hetta tíðarskeiðið vísti Elias Ellefsen á Skipagøtu veruliga sínar dygdir sum spælskipari. Millum annað við góðari ferð í spælinum, trimum málum, tveimum uppleggum og einum vunnum brotskasti.

Samanlagt var Elias næstbesti málskjútti í dystinum við seks málum. 23-ára gamli føroyingurin er skrásettur fyri tvey upplegg, og vann hann trý brotskøst, sum Kiel umsetti til mál.

Sí meira um dystin her

Erlangen nærkaðist aftur men ongantíð nærri enn tvey mál. Tað endaði 29-31 og harvið góð byrjan hjá Eliasi og teimum.

Verri gekst hjá Vilhelmi Poulsen og Hannover-Burgdorf í gjár í allarfyrsta dystinum í Bundesliguni 2025/2026. Tað endaði við tapi fyri Gummersbach á heimavølli. 

Meistararnir úr Füchse Berlin, við Hákuni West av Teigum á vinstra vongi, spæla sunnudagin klokkan 15 á heimavølli móti Bergischer.

Dagført: 23.03