Hondbóltur

European League: Fara eftir finaluplássinum í dag

Jóhan á Plógv Hansen og Flensburg vunnu kappingina í fjør og spæla hálvfinalu móti Melsungen klokkan 14. Elias Ellefsen á Skipagøtu og Kiel spæla móti Montpellier klokkan 17 - dystirnir síggjast á Viaplay.

Elias Ellefsen á Skipagøtu og Kiel skulu, eins og í fjør, royna at basa Montpellier á týskari jørð (Savnsmynd: Sverri Egholm)

2025-05-24 10:25

Agnar Prestá

Tað er nógv uppá spæl í Hamborg í dag. Eins og seinastu árini, verða dystirnir í Final Four í European League hjá monnum spældir í næststørsta týska býnum.

Snøgga Barclays leikhøllin verður karmur um hálvfinalurnar í dag og finaluna, umframt dystin um triðja plássið, í morgin.

European League hálvfinalur
Leygardagin 24. mai

14.00: MT Melsungen - SG Flensburg-Handewitt
17.00: THW Kiel - Montpellier Handball

Flensburg, við Jóhan á Plógv Hansen, vann í fjør næststerkastu evropeisku kappingina. Harvið snýr tað seg um at royna at endurvinna European League - fyrst skal man framvið Melsungen, ið kappast um týska meistaraheitið. Felagið hjá Jóhan hevur ikki havt eitt so gott ár í Bundesliguni. Havnarmaðurin á høgra vongi er í gongd við sínari seinastu dystir fyri Flensburg-Handewitt.

Jóhan á Plógv Hansen kann hetta vikuskifti fáa eitt gullheiðursmerki afturat í Hamborg

Hitt norðurtýska risafelagið sær eisini út til at enda uttanfyri Champions League-plássinum í Bundesliguni. Í fjør vóru Elias á Skipagøtu og teir í Final Four í Champions League. Í fjórðingsfinaluni har sigraði Kiel á Montpellier - eftir stórtap í fyrra dystinum. Í kvøld klokkan 17 hittast feløgini í Hamborg. Elias hevur seinastu tóðina ikki havt so stóran leiklut hjá Kiel, sum hann hevði í vetur.

Báðir dystirnir síggjast á Viaplay. TV3 Sport vísir eisini dystin hjá Kiel. Til ber eisini at fylgja við á eurohandball.com

Mynd: EHF

Vinarliga broyt tínar kennifíla - og privatlívsstillingar fyri at síggja hetta innihald