Evropeiska ævintýrið hjá NSÍ endaði við javnleiki

Eina løtu livdi dreymurin um hálvsensatiónina móti núverandi nummar tvey í Sveis.

Lugano kom til Klaksvíkar við 2-0 leiðslu frá fyrsta dystinum. Men eftir mál í 28. minutti, var NSÍ ógvuliga væl við samanlagt.

Les meira um fyrra hálvleik her: NSÍ er á odda í steðginum

Í 1-0 málinum vísti Petur Knudsen sín klassa. Tað gjørdi hann aftur, tá NSÍ skoraði til 2-0 eftir ein tíma. Vinstri vongurin hevði aftur eina góða renning, fekk bóltin, snýtti ein verjuspælara og við perfektari sending yvirum fann Petur nummar 11 Marius Kryger Lindh.

Annað evropeiska málið hjá Kryger í summar, og so var 2-2 samanlagt. Hóast Lugano hevði lagt væl fyri leikliga eftir steðgin og skapt støður, var tað nú NSÍ sum vísti dygdir, kynismu og hevði sinnisligu yvirvágina.

Tíverri varð tað sum hjá Víkingi á sama vølli í 1.umfari: Eftir at hava javnað samanlagt við tveimum málum, svaraði útiiðið aftur skjótt. Í 67. minutti var Yanis Cimignani, og siðani setti sveisiska liðið seg veruliga á tað.

Í 80. minutti brast NSÍ-ballónin eftir deyðbóltsmál. 2-4 samanlag og harvið fer Lugano víðari sum væntað.

Á so mangan hátt fer oddaliðið í Meistaradeildini tó úr Conference League við æru. NSÍ sló lið av Malta, við deildarsroyndum og nógvum peningini, og lið úr Slovenia út - í torførum umstøðum á útivølli. Og móti Lugano var veruligur spenningur í til tíggju minuttir vóru eftir av uppgerðini. 

Hetta sigur eitt sindur, hvat liðið hjá Sigurdi Ragnar Eyðjólfsson, sum hevur verið skert, hevur megnað. Nógvir spælarar vístu seg aftur væl fram, so sum Tom Amos í málinum, og Petur Knudsen vísti dygdir á altjóða pallinum.

Nú skulu teir hjá NSÍ hugsavna seg um at royna at vinna fyrsta meistaraheiti í 19 ár. 

Conference League 3. umfar, seinni dysturin
Hósdagin 10. august við Djúpumýru
NSÍ - FC Lugano (1-0) - 2-4 samanlagt
29' Petur Knudsen (Sammy Skytte) 1-0
61' Marius Kryger Lindh (Petur Knudsen) 2-0
67' 1-2
80' 2-2

Sí meira um dystin her