Fimleikurin vann 13 heiðursmerkir á seinasta degnum og 15 gull samanlagt

Seinastu fimleikakappingarnar á Oyggjaleikunum á Orknoyggjunum vóru fyrr í dag. Eins og fyrr vann fimleikurin fleiri heiðursmerki í hús.

- Í dag var tað finalu kapping, har kappast varð í hvørjum amboði sær. Eins og áður vóru kappingarnar sera tættar og spennandi, og okkara fimleikarar megnaðu at fáa heili 13 heiðursmerki í hús, 9 til menninar og 4 til kvinnurnar.

Soleiðis skrivar Fimleikasamband Føroya á heimasíðu sínari, har hetta yvirlitið er: 

Rókur Sumberg Vestergaard vann gull í beinsveiggj. Torleivur Christiansen vann gull í lopi, silvur í gólvi, og deilt silvur í ringum. Bjarki Johannessen vann deilt silvur í ringum, silvur í lopi og bronsu í rekk. Bjarti Skylv Hansen vann bronsu í parallel barr, og Bjarki í Jákupsstovu vann bronsu í beinsveiggj.

Mia Højgaard vann gull í forskotnari barr, deilt gull í lopi og silvur á gólvi, og Marin Danielsen vann gull á gólvi.

Flest gull av øllum

Harvið komu fimm fimleikagull afturat á seinasta degnum. Samanlagda talið fyri var heili 15. Eingin onnur ítróttargrein hjá Føroyim hevði so nógv gull: Bogaskjóting kom tó upp á heili 9, meðan svimjingin hevði sjey.

Yvirliti yvir føroysk heiðursmerki

Skíggjamynd: orkney2025results.com

Bert svimjingin stóð fyri fleiri føroyskum heiðursmerkjum (30-29), og tað varð enn einaferð týðiligt, at fimleikurin er týðandi fyri Føroyar á oyggjaleikunum. Teir flestu føroysku fimleikararnir hava veruligt altjóða stig.

Fimleikararnir hava eisini vunnið átta silvur og seks bronsur hesa vikuna. 

Sí eisini: Besta úrslit nakrantíð: Føroyar vunnu oyggjaleikirnar

Mia vann seks gull 

Av teimum mongu dugnaligu fimleikarunum skaraði Mia Højgaard mest framúr. 

Hon vann flest gull - seks í tali. Fimm av teimum vóru í einstaklingakapping og ein í liðkapping. 

Í All-Round kappingini í gjár varð Mia Højgaard besti fimleikarin av øllum - Bjarki Johannesen var nummar trý.

Mia Højgaard og Bjarki Johannesen (Mynd: Fimleikasamband Føroya)