Føroyingar stríðast til tað síðsta um pláss í bestu norsku deildini

Fýra føroyskir landsliðsspælarar í Noreg enda hesa vikuna sítt kappingarár. Spurningurin er, um tað verður sum niðurflytari ella við júst at yvirliva.

Í bestu mansdeildini endaði Kristiansand triðaftast. Harvið skuldu Tróndur Mikkelsen, Helgi Hildarson Hoydal og Bjarni í Selvindi spæla ímóti Melhus. Í fyrstu royndini gjørdist talan um tryggjan sigur, men sunnudagin gekk galið á útivølli.

Harvið skal liðið í kvøld spæla triðja og heilt avgerandi dystin fyri at bjarga plássinum. Hetta er á heimavølli, har Kristiansand er stórfavorittur, og føroysku landsliðsspælararnir skulu avgreiða uppgávuna. Fyrsta bríksl verður klokkan 17.30.

Sí eisini: 
Tróndur er nú tøkur aftur
Føroyingar týðandi leiklut í norska niðurflytingarstríðnum

Tað er longu nú greitt, at Bjarni í Selvindi ikki heldur fram í felagnum - hann fer til Val í Íslandi. Helgi Hildarson Hoydal spælir helst ikki í Kristiansand næsta ár, meðan Tróndur Mikkelsen hevur sáttmála. Allir hesir savnast við landsliðnum um vikuskiftið í samband við avgerandi HM-undandystirnar móti Norðurmakedónia.

Helgi Hildarson Hoydal kann takka fyri seg í felagnum við alt avgerandi sigri (Savnsmynd: Sverri Egholm)

Hjá Anniku Fríðheim Petersen og Follo hevur søgan verið líknandi. Liðið úr bestu deildini vann fyrsta play-off dystin men tapti tann seinna - eisini hóast Annika Fríðheim Petersen hevði gott bjargingarprosent.

Follo spælir sunnudagin seinnapartin heilt avgerandi dystin móti Volda. Hann er á heimavølli. Sum skilst er møguleiki fyri, at hetta veðrur seinasti dystur hjá Anniku í Follo.

Annika Fríðheim Petersen til landsliðsvenjing. Honn kann fáa týðandi leiklut sunnudagin (Mynd: Sverri Egholm)