Full úrtøka til Martin og Ábraham

Tað bleiv til tilsamans fimm gullheiðirsmerki í fimm kappingum hjá Ábraham Bjarnason og Martin Johannessen, sum seinastu dagarnar hava umboðað Føroyar á FrameRunning Camp & Cup í Bagsværd í Danmark.

Seinasta kapping var leygardagin, har teir báðir føroysku rennararnir vunnu gull á 200 metrum. Ábraham setti samstundis nýtt persónligt met, skrivar Parasport Føroyar.

Ábraham vann gull á 200, 400 og 800 metrum, meðan Martin vann gull á 200 og 400 metrum.