Agnar Prestá
Talan gjørdist um eitt blandað evropeiskt kvøld hjá hoyvíkingum.
Hjá einstaklingunum gekk væl í 5. umfari í bólkaspælinum. Füchse Berlin heldur fram við sínari sigursrøð í kappingini - fimm sigrar av fimm møguligum - og Hákun West av Teigum skoraði trygt uppá øll síni trý skot í 38-27 sigrinum á norska Kolstad. Føroyski høgri vongurin hevur verið so at siga lýtaleysur í kappingini higartil fyri týsku meistarnar.
Her ber til at síggja málini - á Siggi Channel á Youtube
Í Zagreb vann GOG lyklasigur. Óli Mittún spældi ein góðan dyst - við millum annað fimm málum og fleiri uppleggum og har var nógv ferð og góðska í GOG-spælinum. GOG streykt avstað fyri steðgin, serliga fyrstu smáu tjúgu minuttirnar, og legði grundarlagi við 19-11 leiðslu í steðginum.
Danska liðið hevur nú vunnið bæði í Kroatia og í Norðurmakedónia, og tað eru helst júst Balkan-liðni, sum Óli og teir skulu halda aftanfyri seg fyri at koma víðari.
Sí hæddarpunkt úr Kroatia her - millum annað góð mál og upplegg hjá Óla Mittún - her
Sí støðurnar í teimum báðum Champions League bólkunum her
Barndómsfelagið hjá landsliðsúrmælingum spældi European Cup-dyst í Bosnia. Talan var um fyrra dystin í 2. umfari í triðsterkastu evropeisku kappingini.
Ilt var at meta um møguleikarnar áðrenn, men tað vísti seg skjótt at verða tungt hjá H71 í evropeiska dystinum. Tað hjálpti ikki, at Peter Krogh fekk beinleiðis reytt kort eftir bara seks minuttir. Hoyvíkingar fingu ikki veruliga fatur og taptu við átta málum. Í steðginum var 17-14 til heimaliðið.
Harvið verður ógvuliga trupult at venda tí leygarkvøldið, tá seinni dysturin verður - eisini í høllini hjá RK Konjuh Živinice við larmandi heimaáskoðarum.
Jákup Egholm varð topskjútti hjá H71 í kvøld við fimm málum. Vongurin hinumegin, Jón Rói Mohr Høgnesen, skoraði fimm mál. Í mogtin, fríggjadagin 17. oktober, spælir StÍF torføran útidyst móti HC Vojvodina.
Vinarliga broyt tínar kennifíla - og privatlívsstillingar fyri at síggja hetta innihald