Málið um Atla Gregersen: - Hetta er óvirðiligt fyri føroyskan fótbólt

Mánadagin savnast manslandsliðið aftur. Hetta í sambandi við HM-undankappingardystirnar móti Kroatia (Tórsvøllur, 5. september) og Gibraltar (á útivølli 8. september)

Hetta verður aftur við Atla Gregersen sum hjálparvenjara. Eingin ivi er um tað. 43-ára gamli fyrrverandi landsliðsliðformaðurin skrivaði í februar undir tvey-ára sáttmála sum hjálparvenjari hjá Eyðuni Klakstein og Føroyum.

Tann sáttmálin hevði eina heldur løgna áseting: Liðformaðurin hjá Víkingi skuldi gevast at spæla fótbólt, tá Víkingur var liðugt í evropeiskum fótbólti fyri 2025 og annars í seinasta lagi 31. august.

Víkinga-liðformaðurin vildi ikki gevast

Hendan neyðsemjan varð gjørd, tí stóra knútapunktið fyrst í februar var, at Fótbóltssamband Føroya kravdi, at Atla Gregersen gavst at spæla, um hann skuldi verða fastur hjálparvenjari.

Høvuðspersónurin vildi tó sjálvur ikki bara soleiðis seta gaggurnar. Millum annað tí liðformaðurin ikki vildi svíkja og leypa frá Víkingi so brádliga. Víkingur "gjørdi eisini vrøvl". Kappingarbyrjan nærkaðist, ongar samráðingar høvdu verið millum FSF og Atla  - og heldur ikki millum FSF og Víking - áðrenn februar fór í gongd.

Ársins spælari í 2024 hevði eina avtalu við føroyameistarar galdandi til 31. oktober 2025. Tá ein loysn ikki fekst á hesum, fóru partarnir frá borðinum í nakrar dagar.

Sí eisini - støðulýsing frá 9. februar: Atli verður helst ikki hjálparvenjari

Í vikuni eftir loysnaði. FSF og Eyðun Klakstein høvdu eina semju, man vildi hava Atla við sum hjálparvenjara, og neyðsemjan millum FSF og Atla Gregersen gjørdist so tann omanfyrinevnda.

Beinavegin hildu nógv í og kring føroyska fótbóltsumhvørvi, at hetta var ein løgin og ólogisk áseting. Tí hví skuldi Atli Gregersen gevast við sínari glæsiligari tíð sum fótbóltsspælari mitt í einum kappingarári; møguliga bert tveir mánaðir frá einum kappingarenda tá hann kortini gjørdist hjálparvenjari. Og hvat um Víkingur kom í evropeiskt deildarspæl og/ella steypafinalu?

Atli Gregersen og Eyðun Klakstein saman við Christiani Andreasen til tíðindafundin 14. februar. Tá var alt uppá pláss, men í vikuni upp til hevði tað verið skinklut, og nú er stórt spurnartekin kring mest serligu ásetingina í sáttmálanum (Mynd: Sverri Egholm)

Sí eisni samrøðu frá 14. februar: Atli Gregersen gevst eftir Evropa-luttøkuna

Tikið upp av nýggjum - feløg eru ímóti og FSF ivast

Ta seinna er nú veruleiki: Víkingur skal spæla steypafinalu móti KÍ síðst í oktober, men sum støðan er nú, verður tað uttan Atla Gregersen

Tey flestu eru helst samd í, at hjálparvenjarin á manslandsliðnum ikki burdi verið spælari í fremstu røð og millum annað verið liðfelagi við landsspælarar og spælt ímóti nógvum øðrum.

Tað hevur tó higartil als ikki verið neyðugt at seta spurnartekin við gegni hjá Atla Gregersen. At hetta varð, og er ein serstøða, kann helst eisini breið semja finnast í.

Og spurningurin er: Um Atli Gregersen kortini kundi halda fram at spæla, hví so ikki bara alt árið, sum hann eisini hevði sáttmála fyri?

FM-vinnari í fjør og nú hjálparvenjari á landsliðnum

Víkingur varð sligið út úr Conference League í Belfast fyrr í mánaðinum. Harvið gjørdist eisini greitt, at ásetingin í sáttmálanum millum FSF og Atla Gregersen kom í gildi (Mynd: Sverri Egholm) 

Hendan spurningin hevur Víkingur reist av nýggjum seint í summar. Sum Kringvarpið hevur skrivað í vikuni, er ein almenn umbøn fyri kortum send úr Sarpugerði um, at liðformaðurin hjá Víkingi kann spæla næstu tveir mánaðirnar eisini.

  - Vit halda ikki, at hetta er ein virðiligur endi upp á eina so flotta yrkisleið sum ta hjá Atla Gregersen. Eg skilti ongantíð avtaluna um, at hann skuldi gevast mitt í kappingarárinum. Okkara áheitan er, at Atli Gregersen spælir restina av kappingarárinum. Tað hevur hann uppiborið, sigur Brandur Jacobsen við Kringvarpið.

Mótspurningurin kann vera: Hví skal hetta reisast av nýggjum og gerast eitt mál aftur: Hví kann mann ikki halda seg til upprunaligu ætlanina.

Forfólkini í B36 og HB eru í øllum førum ikki samd við formanninum hjá Víkingi, og vilja tey ikki broyta sína greiðu støðu, sum feløgini hava havt síðani í vetur: Tað er ikki rætt at blanda leiklutin sum spælari og hjállparvenjari saman verður millum annað víst á.

Feløgini "eiga" jú FSF, og so er spurningurin, um starvsnevndin og topparnir í FSF halda seg til upprunaligu ásetingina og lurta eftir millm annað HB og B36 ella ganga umbønini hjá Víkingi á møti. 

- Ein glantrileikur sum er óvirðiligur fyri føroyskan fótbólt

Hetta er nakað, sum ein avgerð burdi verið komið um í hesari vikuni. Víkingur spælr móti B68 í kvøld, 30. august. Sambært sáttmálanum frá februar verður dysturin á Svangaskarði klokkan 18.30 tann seinasti, sum Atli Gregersen kann spæla í.

Støðan varð í gjár viðgjørd í sendingini Fótbóltsskýlinum á FM1. Ronnie Thomassen, viðmerkjari og fyrrverandi ungdómsábyrgdari í B36, er ikki bergtikin av tilgongdini: 

- Har skuldi vera ein fundur í FSF hósdagin, har avgerðin skuldi takast. Har er so hvørki komin nakar hvítur ella svartur roykur, so at eg ani einki, hvat man er komin fram til. Men sum eg skilji á lagum - sum man hoyrir á vatnrørunum, keldum og alt hetta her - so eru størri sannlíkindi fyri, at Atli spælir restina av árini, enn at hann ikki ger tað.

- Eg haldi, at eg tori at kalla hetta fyri eina "farce". Tí tað er tað, sum tað er. Tak nú for hundan eina avgerð og halt fast við tí avgerðina. Ístaðin fyri at koyra eitt skuggaboksispæl, sum eingin skilur. Hetta er óvirðiligt fyri føroyskan fótbólt: At hava eitt slíkt mál kring hjálparvenjaran á A-landsliðnum og eitt lið, sum liggur nummar fýra og skal í eina steypafinalu...hetta hoyrir ongastaðni heima.

Ronnie Thomassen staðfestir, at fyri hann snýr tað seg ikki so nógv um, hvørt hjálparvenjarin á landsliðnum spælir ella ikki spælir. Heldur ikki sum B36-fjeppara sum Víkingur kappast við um evropeiskt pláss. Hetta snýr seg um at taka eina avgerð. Hann hevur tó eina áheitan til tey, sum sita við hesum málinum: - Fá tað for hundan av borðinum sum skjótast, tit sum sita við tí.

Áki Johansen er samdur í at hetta málið ikki skal hanga, og at skjótt gjøgnumskygni er umráðandi: Venjarin og greinarin staðfestir eisini, at tað er óneyðugt, at hetta gjørdist eitt mál nú í august 

- Eg haldi, at tað er nokso viktugt, at man meldar út hvat fyri avgerð verður tikin. So øll vita tað, og so vit ikki hava "breaking news" annaðhvørt vikuskifti um eina lutfalsliga lætta støðu. Støðan kemur jú av, at man fyrr í ár ger eina serliga avtalu. Tað er lætt at vera bakklókur, men tað rætta hevði nokk verið, at man tá segði: Antin spælir hann alt árið, ella spælir hann slett ikki víðari.

Áki sigur seg skilja væl, hví Víkingur nú ger alt fyri, at man roynir at halda Atla Gregersen í spæl alt árið: Serliga tá man nú missir meira fólk (Poul Kallsberg og Árna Nóa Atlason, red.), og tá liðformaðurin er so týðandi spælari og ein steypafinala er fyri framman. Og í spurninginum um landliðið:

- Í mun til um hann er ógegnigur til landsliðsúttøkur ella ikki: So hevur hann verið tað frammanundan eisini. Tað er eingin munur á nú og fyrr í ár, ella hvussu tað verður aftaná 31. august, staðfestir Áki Johansen, sum sjálvur hevur verið knýttur at landsliðnum áður.

Til ber at hoyra Fótbóltsskýlið frá í gjár her  - kjakið um støðuna hjá Atla Gregersen, Víkingi og FSF 

Sum Ronnie Thomassen sigur, varð málið til umrøðu hósdagin. Eingin almenn fráboðan fyriliggur tó, og sum Portalurin skilur, so er enn eingin endalig avgerð tikin um, hvørt Atli Gregersen spælir fótbólt eftir landsliðssteðgin ella ikki.

Dagført: 08.57