2025-08-30 13:55
Agnar Prestá
Agnar Prestá
Seinastu vikuna hevur HM-svimjikappingin hjá Virtus verið í Bangkok, har Oddvá Sedea D. Nattestad (2006) úr Havnar Svimjifelag umboðaði Føroyar.
Hetta í bólkinum II3 sum sambært Parasport Føroya er fyri vælfungerandi fólk við autismu. Hetta er lutfalsliga nýggjur bólkur innan svimjing.
Sum vit skrivaðu sunnudagin, so fekk Oddvá Sedea eina frálíka byrjan við HM-silvuri og evropeiskum meti. Hetta var í 50 metrar bringu, og nakrar dagar seinni gjørdi hon tað aftur í 100 metrar bringu.
Sí eisini: Enn eitt føroyskt silvur og evropeiskt met í Bangkok
Sum heild vóru úrslitini ógvuliga flott, og setti Oddvá Sedea Nattestad persónligt met í øllum sínum kappingum.
Úrslit hjá Oddvá:
• 50m bringa: 37.61 – (evropeiskt met)
• 200m blandað: 2.52.92
• 100m bringa: 1.24.52 – (evropeiskt met)
• 100m frí: 1.05.67
• 50m frí: 29.91
Kelda: Parasport Føroyar
Ein av størstu stjørnunum í kappingini, Kate Wallington úr Avstralia, setti heimsmet í øllum sínum kappingum og gjørdist besti kvinnuligi svimjari í allari kappingini. Oddvá lá beint aftanfyri í tveimum greinum.
Vinarliga broyt tínar kennifíla - og privatlívsstillingar fyri at síggja hetta innihald