Óli Mittún kosin til ársins spælara í Svøríki

Hann kom til Svøríkis sum ein drongur, ið júst varð fyltur 17 ár. Hann fer sum besti spælarin í svenskum hondbólti. 

Nú 19-ára gamli Óli Mittún fer til størri avbjóðingar, og tað er ógvuliga hóskandi, nú føroyingurin fer at fylla 20 ár, og hann er kosin til ársins spælara í Handbollsligaen.

Sí eisini: Óli Mittún spælt sín seinasta dyst í svenskum hondbólti

Almenna heitið er MVP (Most Valuable Player), og 19-ára gamli hoyvíkingurin fekk 48 prosent av atkvøðunum. Tað eru venjarar í feløgum, umframt landsliðsvenjarin - fyrrverandi venjarin hjá Óli í Sävehof - sum saman við mongum ítróttartíðindafólki atkvøddu.

Talan gjørdist harvið um ein rímiliga greiðan sigur. Óli varð eisini toppskjútti ("Skyttekung") og annað árið á rað besti spæliskipari í Handbollsligaen. Sävehof endurvann ikki svenska meistaraheitið, men nummar 78 endaði ógvuliga væl persónliga í Partille og í svensku hallunum.

Dygdirnar hjá Óla Mittún eru komnar landsliðnum og IK Sävehof væl við seinastu árini. Hetta var aðru ferð uppá fýra ár, at ein føroyingur gjørdist ársins spælar hjá monnumi í Svøríki (Mynd: Sverri Egholm)

Í summar skiftir Óli Mittún til danska GOG. Áðrenn tað er tó ymiskt á skránni - hondbóltur og annað.

- Eg havi eitt sindur av tíð, áðrenn eg skal avstað við U21-landsliðnum til HM í Póllani. Síðani skal eg vera saman við vinum og familju í Føroyum - møguliga ein túr til eitt heitari land - men so eisini vera nógv í styrkirúminum áðrenn næsta kapittilin í Danmark.

Soleiðis sigur MVP í Handbollsligaen við handbollsligan.se.

Í fjør vann fyrrverandi liðfelagin hjá Óla, málverjin Simon Möller stóra heiðurin. Í 2021/22 var tað sysktinabarnið, sum eisini spældi við Sävehof. Undan Elias Ellefsen á Skipagøtu og Óla Mittún hevur millum annað Felix Claar (tvær ferðir) vunnið heiðurin.

Elias og Óli eftir ein hálvfinalusigur í Ystad í 2023. Tað var júst Ystads, sum endaði tíðina hjá nummar 78 í svenskum hondbólti - í SM-hálvfinalunum. Systkinabørnini hava nú bæði verið besti spælari í í Svøríki