Plássið í Dortmund er ikki tryggjað enn

Í og fyri seg er uppgávan sára einføld. Vinna Føroyar dystin í morgin móti Paraguai, so er plássið í miðumfarinum tryggjað. Og eisini tvey stig – tey, sum vit vunnu móti Spania á ótrúligan hátt í gjárkvøldið.

Spæla vit javnleik so er plássið og tey tvey stigini eisini tryggjað.

Men tapa vit móti Paraguai, so stendur verrri til.

Í grein, sum vit skrivaðu á Portalinum í morgun (hon er nú rættað) skrivaðu vit, at plássið í miðumfarinum var tryggjað, tí vit hava so nógv betri betri málúrtøku enn Paraguai. Men tað er ikki nokk. Tí um Føroyar og Paraguai koma at standa á jøvnum í stigum, so er tað ikki málini, men innanhýsis dysturin, sum er avgerandi fyri hvør kemur at liggja omanfyri. Og tað verður so Paraguai.

Tað, ið so kann bjarga okkum er um Spania so tapur móti Montenegro í dystinum, sum verður spældur aftan á okkara. Hendir tað, so enda Spania, Føroyar og Paraguai við tveimum stigum, og so verður málúrtøkan tikin í brúk fyri at gera av hvat av liðunum ikki sleppur við. Og tá hava Føroyar ein góðan møguleika – um vit ikki tapa við ov nógvum málum móti Paraguai.

Hoyr samrøðu við Janu og Súnu fyrr í dag:
- Gloymdu at spæla víðari aftan á síðsta málið, men tá var tað heima

Og við Elsu og Rannvá:
- Áskoðararnir hjálptu okkum til sigur

Tað er soleiðis, at tey trý londini fáa tey stigini við sær, sum tey hava vunnið móti hvørjum øðrum. Ikki tey, ið eru vunnin móti liðinum, sum ikki sleppur víðari.

Annars hevur plaseringin í bólkinum ikki tann stóra týdningin. Tað er bara fyri at gera av í hvørjari raðfylgju vit skulu møta liðunum, sum koma víðari úr bólki C. Og sannlíkt er, at tey verða Týskland, Serbia og Ísland. Ísland tryggjar sær víðari luttøku, um tær vinna á Uruguay í síðsta dysti.

Liðini, sum enda á fjórða plássi í bólkunum eru tó ikki liðug í HM-kappingini hesaferð. Tey halda fram í Presidents Cup, har spælt verður plaseringarnar frá 25 til 32.