Ranja og Sirkill vunnu FM í Tvíspor til Nólsoyar

Triðja árið á rað vann ein ung genta, sum reið fyrsta árið í Tvíspor fyrsta flokk kappingina. Hesa ferð var tað 17 ára gamla Ranja H. Djurhuus, sum reið á Sirkill, hestinum hjá Óla Svein Lutherusson úr Nólsoy. Hetta er fyrstu ferð eitt ross sum er heimhoyrandi í Nólsoy vinnur eitt FM heiti.

Undan kappingini í gjár vóru Sirkill og Ranja mett at hava bestar møguleikar at vinna FM. Men um nakar ivi var, so gjørdu tey hann til skammar í kappingini. Tey bæði vunnu greitt á degnum og høvdu eisini bestu tíð av øllum á breytini. Sostatt vunnu tey FM við 28 stigum. Nummar tvey á degnum og í FM var Svanna og Barbara Carlsen, tær báðar fingu 22 stig. Silfá og Ása Bárðardóttir, sum vunnu FM í 2023, gjørdist nummar trý, bæði á degnum og í FM, tær fingu 20 stig.

Tvíspor ung vann Thor úr Syðradali. Sólrun Lútzen ríður Thor, ið eisini vann FM við 33 stigum. Nummar tvey í FM og á degnum gjørdist Kiljan og Simona Tornby við 26 stigum. Nummar trý í FM og degnum var Orka og Eyðdis H. Djurhuus.

FM í Trav var sera spennandi og var tað einans 4 hundrandapartar av einum sekundi sum avgjørdi FM. Undan kappingini í gjár var Dropi á odda, eitt stig framman fyri Gíg. Men av tí at Gígur vann á Dropa í kappingini í gjár yvirhálaði hann Dropa, bæði á degnum og í FM. Gígur fekk 25 stig og Dropi 24 stig. Tað eru systkinabørnini Simona Tornby og Lív Djurhuus, sum ríða Gíg og Dropa. Nummar trý á degnum og í FM gjørdist Doran við Fíu Nolsøe á baki.

Bæði FM í Skeið og Tølt var eisini avgjørt á degnum. Í Skeið vann Stígur og Randarsól Heinensen á Brúna hjá Jóannes Debes, og í Tøltinum var tað Brynjar og Regin Johannesen sum vunnu á Tango hjá Silju G. Eystberg. Bárður Johannessen gjørdist nummar trý í hesum báðum greininum. Í Skeið á Kviku og í Tølt á Stráki. Raðfylgjan á degnum og í FM var nevt tann sama.

Bárður Johannessen gjørdist eisini nummar trý í Tvíspor annar flokkur. Tá reið hann á Lítla. Har vann Marengo og Laila W. Mouritzen, og Tindur við Barbaru R. Mouritzen gjørdist nummar tvey. Hesin flokkur er ikki FM grein.

Ríðisamband Føroya