Skaptu HM-yvirskriftirnar við søguliga sigrinum á Spania

Tað hevur sent bylgjur av skelki gjøgnum honbóltsheimin og vakt stóra undran, at Føroyar í gjár koppaðu Spania í bert øðrum HM-endaspælsdystum hjá liðnum og føroyskum A-landsliðshondbólti.

Íslendskir, danskir og norðurlendsku miðlarnir eru teir, sum skriva mest um “sensatiónina”, "søguliga bragdið” og “føroysku fólksveitsluna”. Eisini hava altjóðar hondbóltssíður víst nógv til frálika føroyska kvøldið og spurt: Hvussu ber hetta til.

(Mynd: Sverri Egholm)

Í føroysku leguni í Trier var eisini ovfarakæti - á knáu kvinnunum, snilda venjaratoyminum, røsku hjálparfólkunum og nærum ótrúligu føroysku áskoðarunum. Men úrslitið móti HM-silvurvinnarunum frá 2019 er, so løgið tað ljóðar, ikki so ógvusliga óvæntað allastaðni í føroyska hondbóltsheiminum.

Ein vøkur føroysk symbiosa skelkaði Spania í Trier
Har eru eyðsýndar dygdir á føroyska liðnum. Og at Spania er í einari skiftistíð og væl frá at loyva sær at hava vónir um eitt silvur, sum fyri seks árum síðani, ella eitt 4. pláss, sum frá 2021, er eyðsæð. Møguleikar sóust í hesum dystunum eftir Montenegro-dystin mikukvøldið.

Spania er tó framvegis eitt sterkt lið. Frá teimum føroysku vónunum, og frá hugsjónini til at tað ber væl til, og til so at útføra tað í verki er ikki bara sum at siga tað. Og eftir nakað skinklut spæl fyri steðgin og minus 3 á máltalvuni, spældu føroysku kvinnurnar sín besta hálvleik nakrantíð í 2. hálvleiki í SWT-høllini.

Tað var ein fragd fyri føroyingar at síggja og ein staðfesting av, hvat føroysku kvinnurnar kunnu - eisini tá pallurin er stórur og nógv stendur á.

Til ber at tosa um framúrskarandi 2. hálvleikin hjá Rakul Wardum, sum nærum stongdi fyri sponsku skotunum og vísti stóra sinnisliga styrki, umframt nógvar málverjudygdir og eitt nýtt toppstig. Um at Pernille Brandenborg, dagsins spælari (7 av 7) og HM-toppskjútti eftir fyrstu tríggjar dagarnar, aftur og aftur vísir vegin á ymsan hátt. Um at vit hava spælarar, sum standa til at blóma bæði á landsliðnum og í løtuni í donskum hondbólti - og at Jana Mittún í løtum prógvaði seg sum eitt tað størsta unga navnið í heimshondbólti.

(Mynd: Sverri Egholm)

Men samanumtikið var hetta eitt stórt liðavrik: Eitt felags føroyskt ódnartak og ein vøkur súmbiosa millum framfýsnar spælarar, íðið venjaratoymi og bestu fjeppararnar í endaspælinum.

Serliga tann kynisman í øllum pørtum av spælinum seinastu løtuna var sigandi. Føroyar skoraðu fimm av seinastu seks málunum - stóru fimm minuttirnar - og byrjandi spælarar, umframt tær sum komu inn til leiklutir, tóku stóra ábyrgd og vóru kaldar.

At gagnnýtisprosentið (skoringsprosentið) var 10 prosent hægri enn móti Montenegro, sigur eisini søguna um eitt lið, sum arbeiðir væl við tingunum og er í menning - og okkara vóru væl kaldari tá á stóð móti sponsku stórfavorittunum.

(Mynd: Sverri Egholm)

(Mynd: Sverri Egholm)

Ein nýggjur føroyskur yvirleggjari
Tær prógvaðu tað móti Kroatia til EM-endaspælið í fjør. Tað gjørdu tær aftur í EM-undandystinum í Íslandi í síðsta mánaða. Men dysturin í gjár var størsta úrslitið hjá kvinnulandsliðnum higartil og ein nýggjur yvirleggjari fyri føroyskan hondbólt sum heild. Leingi fer man at tosa um novemberfríggjakvøldið í Trier.

Møguleiki er at byggja á longu í morgin, tá Føroyar skulu gera arbeiðið í innleiðandi bólkinum væl og virðiliga liðugt móti Paraguay - tá standa føroysku kvinnurnar sum stórfavorittar.

Síðani liggur tað upp til, at Føroyar í næstu viku skulu royna seg í HM-meginumfari móti Serbia, Íslandi og Týsklandi í Dortmund. Har verður vónandi møguleiki at laða nýggjar varðar og raka toppstig, sum venjarar og spælarar hava tosað nógv um upp til og undir søguliga HM-endaspælið.

Seinni hálvleikur móti Spania var toppstigið higartil hjá liðnum - ein minnilig mynd av, at tað ber til føroyingum.

Toymi okkara í Týsklandi hevur eisini nógv tilfar í morgin, tá Føroyar og Paraguai spæla klokkan 14.30. Hinar dagarnar hevur FM1 sent beinleiðis klokkan 11, men í sunnudagin verður sent frá upphitingini klokkan 13.

--

Hoyr fimtu sendingina av FM1 í Trier her