Skeggið hjá Mladen fór av longu í skiftingarrúminum

- Nú síggi eg út, sum eg gjørdi, tá eg kom til Føroyar fyri tólv árum síðani.

Soleiðis helt serbin, sum hevur havt sín heimstað í Føroyum so at siga síðani 2013, skemtiliga fyri stutt eftir søguligu løtuna í Póllandi sunnudagin.

Á kyndil.fo ber til at síggja, Mladen sá út fyrstu løturnar í Føroyum

Mladen Mjerimacka er kendur fyri sítt góða málverjupsæl. Hann er fleiri ferðir kosin ársins málverji í Føroyum. 

So er hann eisini eyðkendur fyri sítt nógva skegg. Tað var tó ein greið avtala millum U21-spælarar og málverjuvenjara undan endaspælinum: Endaðu Føroyar við HM-heiðursmerki, so skuldi skeggið av.

Fór av í skiftingarrúminum - myndir

Tað reyk eisini beinanvegin: Rakimaskinan var við í Arena Katowice til bronsudystin móti Svøríki.

Eftir seinasta bríksl sást Mladen í ovfarakæti saman við spælaranum - við sínum stóra skeggi.

Her hond í hond við Torstein Sivertsen, annan av málverjunum meðan teir fegnast saman við áskoðarunum (Mynd: Sverri Egholm)

Og her saman við dagsins spælara í bronsusigrinum, Aleksandar Sasha Lacok. Teir báðir kennast heilt væl 

Spælararnir vistu, hvat sigur teirra á Svøríki millum annað innibar...her arga Óli Mittún og Rókur Ziskason eitt sindur nakað eftir, at hallarurið hevði ljóðað (Myndir: Kolektiff/IHF)

Sí eisini: Pápi Sasha: - Vit vita næstan ikki hvussu stórt hetta er

Tá spælarar og venjaratoymið komu út aftur úr skiftingarrúminum - at heilsa uppá og seinni fáa heiðursmerki, sá Mladen heldur øðrvísi út. Eyðbjørn Heini Danielsen og hann hava spælt saman í VÍF, og Eyðbjørn syrgdi fyri, at avtalan varð hildin:

Eyðbjørn avgreiddi uppgávuna sum "hárskeri" skjótt og væl í skiftingarrúminum...(Mynd: IHF/Kolektiff)

Sí eisini: Eyðbjørn slapp loksins at spæla í einum HM-endaspæli

Úrslitið var týðiligt:

Mladen saman við unnustuni eftir dystin - nú bert við stubbum

Her síggjast Durita Rouch, Mladen Mjerimacka og Hjalti Mohr Jacobsen í ovfarakæti til heiðursmerkjahandanina (Mynd: Sverri Egholm)

Sí eisini: Hátíðarliga og søguliga heiðursmerkjahandanin (Myndir)

Mladen hevur gjørt mun

Í fjør varð Mladen settur sum parttíðar málverjumennari hjá Hondbóltssambandinum. Umframt at spæla sjálvur, nýtir Mladen harvið tíð uppá at arbeiða við føroyskum spælarum. Hetta skal hann eisini gera á staðnum í Klaksvík, tá 36-ára gamli serbin skal spæla við Team Klaksvík eftir summarstegðin.

Sí eisini: Mladen flytir til Klaksvíkar

Hann hevur í árunum í Vestmanna arbeitt nógv saman við Sasha Lacok, sum undir U21 HM spældi seg heitari og heitari. A-landsliðsspælarin varð dagsins maður í bronsudystinum og móti Slovenia í fjórðingsfinalusigrinum.

Umframt góða og nærlagda arbeiðið við føroysku málverjunum hugdi málverjuvenjarin nógv eftir málmonnunum hjá liðunum, sum Føroyar skuldi spæla ímóti. Hetta var fyri at fyrireika føroysku spælararnr so væl sum gjørligt til, hvar og hvussu man helst skuldi bera seg at í skotstøðum.

Hetta kom kanska serliga vongspælarunum til gagns í kappingini.

Mladen Mjerimacka er ikki á Vaglinum nú, har føroysku spælararnir og toymið verða heiðraði fyri søguligu bronsuna. Hann er í Serbia, har hann millum annað hevur verið í sjónvarpsinnslagi við pápanum, sum eisini eigur eitt HM-heiðursmerki; sum spælari fyri Jugoslavia.