U19 HM: Føroyar fingu Týskland, Slovenia og Uruguay

Á pappírinum er helst talan um eitt miðal lutakast, staðfestir Hondbóltssamband Føroya, sum skrivar soleiðis um mótsstøðuliðini: 

- Týskland gjørdist nummar 5 í EM-endaspælinum í fjør summar, har Føroyar gjørdust nummar 15. Føroyar spældu móti Týsklandi í upphitingarkappingini til EM-endaspælið, hetta í Nations Cup í Lübeck. Tá vunnu týskarar 32-23.

- Slovenia gjørdist nummar 9 í EM-endaspælinum og møttu Føroyar slovenum í millumumfarinum, har Slovenia vann 32-25. Uruguay vann seg til HM-endaspælið við at gerðast nummar trý í suðuramerikonsku undankappingini.

Harvið eru helst fínir møguleikar móti Uruguay, meðan Týskland og Slovenia fara at vera favorittar móti Føroyum, sum var styrkismett lægst til lutakastið.

Lutakastið:

Bólkur A: Svøríki, Portugal, Kuveit, Eysturríki

Bólkur B: Ungarn, Sveis. Marokko, Kosovo

Bólkur C: Serbia, Spania, Kroatia, Algeria

Bólkur D: Ísland, Brasil, Guinea, Saudi Arabia

Bólkur E: Týskland, Slovenia, Uruguay, Føroyar

Bólkur F: Noreg, Frakland, Argentina, (ikki avgjørt)

Bólkur G: Egyptaland, Japan, Suðurkorea, Bahrein

Bólkur H: Danmark, Tunesia, Kekkia, USA

Tvey tey ovastu liðini úr hvørjum bólki koma víðari at spæla um topp 16, meðan tvey tey niðastu spæla sonevnda Presidents Cup, um plássini 17-32.

Til seinasta HM-endaspæl fyri U19-menn endaðu Føroyar á 8. plássi. Hetta var við millum annað Óla Mittún, Ísaki Vedelsbøl, Aleksandar "Sasha" Lacok og Trúgva Hávardsson.