VB spælir aftur í bestu deildini komandi kappingarár

Tað var eisini ein missur fyri føroyskan kvinnuhondbólt, tá greitt varð í fjør, at VB ikki fór at spæla í bestu deildini. Eftir eitt gott 2017/2018, har VB av álvara bjóðaði av um finalupláss og fekk bronsu, misti liðið so nógvar leikarar (uttanlands og aldur), at felagið ikki metti, at tað gav meining at spæla í fremstu røð.

Í dag skrivar Suðuroyarportalurin, at dystir í bestu deildini aftur verða í Vágs Høll komandi kappingarár. Hetta váttar formaðurin í VB, Bogi Mortensen. 


(Bogi Mortensen og Martin Skarnvad - Mynd: Suðuroyarportalurin)

Í fjør spældi VB í 1. deild. Ungur danskur venjari varð settur í februar, og 21-ára gamli Martin Skarnvad skal standa á odda fyri besta liðnum hjá VB í bestu deildini.