Føroyskir lyftarar góð úrslit í Eysturríki

Leygardagin 22. august varð 20th International Women Grand Prix hildin í Wels í Eysturríki. Føroyar vóru umboðaðar av trimum lyftarum: Herborg Eyðunsdóttir Justinussen, Barba Jansdóttir Andreasen og Maibrit Reynheim Petersen. Avtrat teimum var Frank Petersen við sum venjari.

Sterk framløga hjá Herborg
20 ára gamla Herborg Eyðunsdóttir Justinussen hevði ein sera góðan kappingardag. Hon setti nýggj persónlig met í báðum lyftum, við 1 kg betring í trekk og 2 kg í vend og stoyt. Samlaða úrslitið gjørdist 129 kg, sum gav henni 170,13 Sinclair-stig.

Hjá Herborg var kappingin eftir tvýdysti í vektbólkinum -63 kg fyri vaksin, tað vil siga í bólkinum fyri øll frá 15 ár og eldri. Hon endaði nummar 12 av 16 luttakarum. Hetta er besta úrslitið hjá Herborg higartil.

Heiðursmerki til Barbu
35 ára gamla Barba Jansdóttir Andreasen kappaðist í -63 kg mastersbólkinum (35–39 ár). Hon lyfti samanlagt 142 kg, ið er hennara triðbesta úrslit nakrantíð.

Í masters-kappingini verður roknað eftir SHMF-stigum, ein sergjørd stigaskipan fyri masters. Her varð kappast yvir allar vektflokkarnar í aldursbólkinum 35–39 ár. Barba gjørdist nummar 3 av 13 íðkarum og fekk sostatt heiðursmerkið. Hon fekk eisini 196,26 SHMF-stig umframt 186,59 Sinclair-stig.

Av tí at nýggir vektflokkar komu í juni, gjørdust øll lyftini hesa ferð føroyskt met.

Barba eigur nú metini í -63 kg flokkinum í 35–39 ára bólkinum, umframt sjálvt -63 kg metið. Herborg eigur junior-metið í sínum flokki.

Óheppið fyri Maibrit
Maibrit Reynheim Petersen, ið hevði arbeitt miðvíst fram ímóti kappingini og var væl fyri bæði í styrki og kropsvekt, skuldi kappast í nýggja 69 kg vektflokkinum. Tíverri gjørdist hon skødd fríggjakvøldið áðrenn kappingina og kundi tí ikki luttaka.

Við persónligum metum og heiðursmerkjum varð aftur staðfest, at kvinnuliga vektlyftingin í Føroyum hevur eitt gott støði og er á rættari leið á altjóða palli.

Føroya Styrkisamband