Í morgin verður aftur farið í gongd

Tey fýra ovastu liðini skulu øll spæla í evropeiskari kapping í august. Av hesari orsøk eru dystirnir hjá teimum í 18. umfari fluttir.

Tvey av teimum fýra liðunum hittast innanhýsis, og tað eru grannarnir HB og B36. Tað er stóruppgerðin í umfarinum, og ein sum kann fáa stóran týdning fyri kappingarárið. HB vann 4-2, tá liðini spældu í 5. umfari og hevur hildið oddasessin hóast eina rúgvu av skaðum. B36 hevur sæð gott út seinstu vikurnar, og 12. juni varð KÍ skúgvað til viks á Tórsvølli, tá B36 vann heili 6-2.

Um tveir dagar verður slagið um Havnina (Mynd: Sverri Egholm)


KÍ skal reisa seg eftir stóra ósigurin fyri B36 (Mynd: Sverri Egholm)

Júst KÍ er annar av stórfavorittunum í morgin, og liðið skal vinna fyri at hanga í, í oddastríðnum. Tað er AB ið vitjar, og seinast liðini hittust, vann KÍ 6-0. NSÍ vann sama dag 4-0 á Skála, og tað er sera ósannlíkt, at botnliðið fær gjørt nakað við NSÍ í morgin, hóast Petur Knudsen ikki er tøkur. Liðið hjá Glenn Ståhl kann vera oddalið eftir dystirnar hesar næstu dagarnar.

Betrideildin 18. umfar (dystirnir eru framskundaðir frá 28.08)
Mikudagin 22.07
18.30: NSÍ - Skála
19.00: KÍ - AB

Hósdagin 23.07
19.00: HB - B36