Landsliðsleikarar og venjari í altjóða dystum í kvøld

Við samanløgdum sigri í tveimum røkkstøkkdystum í november mánað móti svenska Savehof, vunnu Jana Mittún og Viborg seg víðari til European League bólkaspælið, og í kvøld verður fyrsti dysturin.

Tað verður á heimavølli móti pólendska Zaglebie Lubin klokkan 17, at bólkaspælið hjá Viborg verður bríkslað í gongd.

Umframt pólendska liðið er Viborg í bólki saman við Corona Brasov úr Rumenia og Bourgogne Dijon úr Fraklandi. Ovastu tvey liðini í bólkinum vinna seg víðari til fjórðingsfinalurnar.

Dysturin millum Viborg og Zaglebie Lubin sæst á TV3 Sport og Viaplay.

Landliðsliðskipari og landsliðsvenjari ´iChampions League

Onnur á landsliðinum skulu eisini í dyst í dag.

Landsliðsliðskiparin Pernille Brandenborg og norska lið hennara Storhamar spæla Champions League-bólkaspæl og eru á vitjan hjá DVSC Schaeffler í Ungarn. Dysturin byrjar klokkan 19 og sæst á Viaplay.

Føroyski kvinnulandsliðsvenjarin Claus Mogensen og hansara lið Ikast skulu eisini á vøllin í dag. Tað er eisini í Champions League og ungarsk mótstøða úr Ferencvaros. Tað er á heimavølli í Ikast, og tann dysturin byrjar klokkan 17 og sæst á DR2.

Kl. 17
Viborg-Zaglebie Lubin (TV3 Sport/ Viaplay)
Ikast-Ferencvaros (DR2/DR TV)

Kl. 19
DVSC Shaeffler-Storhamar (Viaplay)

Champions League er hægsta evropeiska kappingin, meðan European League er tann næsthægsta.