Mattias Lamhauge er við at gera sáttmála við Strømgodset

Mattias Heðinsson Lamhauge skifti tíðliga í 2024 úr B36 til Fredericia, sum tá spældi í næstbestu donsku deildini. Síðani er liðið flutt upp, og Mattias spældi í 2025 15 av teimum 18 Superliga-dystunum hjá Fredericia.

Nú tvey ár seinni skiftir fyrsti málverjin á landsliðnum til norskan fótbólt. 

Kringvarpið bar í gjár tíðindini um, at Fredericia hevði selt 26-ára gamla føroyingin til Strømgodset.

Sum skilst er Mattias Lamhauge í norska býnum Drammen í dag, og Portalurin og FM1 vita frá fleiri keldum, at alt er við at koma uppá pláss. Væntast kann, at føroyski málverjin verður kunngjørdur í Noreg skjótt.

Harvið skal havnarmaðurin við handskunum eftir øllum at døma spæla fyri millum annað Magna Hoseth: Fyrrverandi KÍ- og B36-venjarin varð í vikuni kunngjørdur sum annar hjálparvenjarin hjá Strømgodset, men sum skilst verður kendi norðmaðuruin høvuðsvenjari.

Magne Hoseth (t.v) varð kunngjørdur sum annar hjálparvenjari hjá Strømgodset í vikuni - her saman við  Jimmy Brinksby. Sum skilt verður Hoseth tó høvuðsvenjari (Mynd: Strømgodset Toppfotball)

Mattias Lamhauge saman við Etienne Green, einum av mongu kappingarneytunum seinastu tíðina í Fredericia (Mynd: Fredericia)

Nýggja liðið hjá Mattiasi og Magna Hoseth flutti í fjør niður úr bestu norsku deildini, Eliteserien. Málið er nú at flyta upp aftur úr OBOS-deildini, og tað skal vera við føroyska landsliðsmálverjanum sum fyrsta málverja.

Tað var Mattias Lamhauge í løtum í Fredericia, men venjarin og felagið tyktust tó ikki at hava 100 prosent álit á føroyinginum. Hetta kom nakrar ferðir til sjóndar í fjør og var helst ein høvuðsorsøk til, at málverjin valdi ikki at leingja sáttmálan, tá tað stóð honum í boði í heyst. 

Ístaðin fekk Fredericia Valdemar Birksø aftur í hópin - kappingarneytin hjá Mattiasi skifti annars til Fredrikstad á sumri 2025. 

Vit hava seinnapartin roynt at fingið fatur á Mattiasi Lamhauge og umboðsmanni hansara fyri at endaliga váttað tíðindini, men tað er ikki eydnast.