Meistararnir úr Madrid megnaðu at vinna í Manchester

Fýra av teimum fyrru play-off dystunum í nýggju útgávuni í Champions League vórðu spældir í gjárkvøldið.

Í gjár, týsdagin 11/2:
Stade Brest 29 - PSG 0-3 (0-2)
Sporting CP - Borussia Dortmund 0-3 (0-0)
Manchester City - Real Madrid 2-3 (1-0)
Juventus - PSV Eindhoven 2-1 (1-0)

Ousmane Dembéle er í stórformi fyri PSG, og hann skoraði tvey av málunum í "fronsku uppgerðini". Harvið er PSG, eins og fyrrverandi felagið hjá Dembéle, so at siga víðari. Dortmund vann eisini 3-0 á útivølli. Øll málini í portugisiska høvuðsstaðnum komu í 2. hálvleiki.

Tað er enn ógvuliga opið millum Juventus og PSV undan dystinum í Niðurlondum - Real Madrid hevur vunnið sær ógvuliga góðan fyrimun.

Erling Haaland legði annars Manchester City á odda tvær ferðir í greitt tí størsta dystinum á kvøldinum. Talan var um tvey heldur umstrídd mál - ta fyrra kannað leingi av VAR fyri møguliga rangstøðu og tað seinna eitt heldur ivasamt brotsspark. 

Erling Haaland fegnaðist í løtum, men eftir seinasta bríksl var kenslan ein heilt onnur (Mynd: EPA)

Real Madrid legði tó líka í og sigraði aftur á Manchester City. Brahim Diaz, ið áður hevur spælt fyri júst City, javnaði, tá fimm minuttir restaðu í av vanligu leiktíðini. Í yvirtíðini var onglendingurin Jude Bellingham á rætta staðnum og avgjørdi til 3-2. Pep Guradiola og hansara menn hava uppaftur meira at hugsa um.

Kylian Mbappé skoraði fyrsta málið hjá kongafelagnum, og ein onnur stjørna setti punktum fyri kvøldið. Tað er tó einki avgjørt undan dystinum í Madrid, sum verður týskvøldið (Mynd: EPA) 

Hini átta liðini í umfarinum spæla fyrru dystirnar í kvøld.

Í dag, mikudagin 12/2:
17.45: Club Brügge - Atalanta
20.00: Celtic - Bayern München
20.00: Monaco - SL Benfica
20.00: Feyenoord - AC Milan

Samanløgdu vinnararnir koma í áttandapartsfinalurnar