Petur og NSÍ syftu Skála

Skála vann 3-0 á heimavølli móti EB/Streyi í 1. umfari og vann allar dystirnar á NSÍ í 1. deild í fjør. Hetta er tó eitt NSÍ-lið, sum hevur fleri streingir at spæla uppá enn í 2023 og 2022 - og eitt NSÍ lið við Peturi Knudsen.

Eftir eitt korter í dagsins kommunuppgerð við Løkin legði landsliðsspælarin heimaliðið á odda við hørðum og góðum skoti. Tað var eisini Petur Knudsen, sum stórar tíggju minuttir seinni legði hornaspark inn til Betuel Hansen, og so var 2-0. Miðvallarin er uppvaksin í felagnum, umframt í Silkeborg, og fór niður við í 1. deild í fjør.

Skála skapti ikki ikki nógv fyri steðgin, har heimaliðið var omaná. Í 2. hálvleiki komu teir appelsinlittu tó nógv betri við. Andreas Egeberg Jacobsen varð skiftur inn, og nakrar spentar støður vóru í og kring NSÍ-brotsteigin.

Í 65. minutti fekk Skála fríspark. Tí tók Jan Ingason Hansen sær av, Kristian Joensen royndi at halda bóltinum, men misti hann ístaðin út til Djóna Petersen, sum takkaði fyri: 2-1

Veruligt lív tyktiskt nú vera í dystinum, men tað doyði fýra minuttir seinni. Skála gjørdi heldur óneyðugt fríspark - sambært teimum eitt ógvuliga bíligt fríspark - næstan beint uttanfyri brotsteigin. Tí tók Petur Knudsen sær av, og 25-ára gamli vongurin legði bóltin hegnisliga og beinrakið uppum múrin og út í longra málhorn - burtur frá fyrrverandi NSÍ-málverjanum Karsteni Hansen. Petur hevur higartil verið við í øllum fimm málunum hjá NSÍ.

3-1 gjørdist endaliga úrsltiið. Tað kom ongantíð veruligur spenningur í: Til tað hevði liðið hjá Jens Wedeborg ov gott tamarhald á støðuni. Fyrsti sigurin hjá svianum í alemennum dysti við róðrið í Runavík, og NSÍ vann á einum av sínum grannum í sínum fyrsta heimadysti aftur í fremstu røð.

Eftir landsliðssteðgin skulu teir í gulum spæla í Klaksvík - Skála tekur ímóti B36. Uppflytararnir hava nú trý stig hvør.