Svenn avloysir Súna í Sarpugerði

Kvinnuliðið hjá Víkingi hevði eina lítla afturgongd í 2023 í mun til undanfarin ár. Tað er helst ikki løgið - serliga tí man síðsta vetur misti Jensu Kannuberg Tórólvsdóttir, sum fór til Thy-Thisted í bestu donsku deildini. Mona Rasmusdóttir skifti eisini har eftir nakrar dystir í kappingarárinum, og ein onnur við royndum á A-landsliðnum, Maria á Lakjuni, fór eisini úr felagnum fyrr í ár.

Nógvar heilt ungar spældu uppaftur meira, og Víkingur endaði sum nummar fimm av teimum átta liðunum. Súni Olsen var venjari á triðja árið - nú hevur hann takkað fyri seg.

Í vikuni hevur Víkingur kunngjørt venjaratoymi til 2024. Høvuðsvenjari verður Svenn Ósbjørnsson Olsen er settur sum høvuðsvenjari hjá Betri kvinnum.

Svenn skal standa á odda fyri liðnum saman við Hans Andriasi Olsen sum hevur verið runt um hópin seinastu tvey árini. Hann er í holt við at taka A-venjaraprógv, kemur at virka sum hjálparvenjari og partvís málmansvenjari.

Víkingur hevur eisini sett fysiskan venjara og fysioterapeut. Talan er um Katrin Petersen, sum millum annað er kend úr flogbóltshópinum.

- Katrin er av Tvøroyri, men er búsitandi í Syðrugøtu. Hon er útbúgvin fysioterapeut og kemur at hava ábyrgdina av kropsligu venjingunum rundanum okkara besta kvinnulið, umframt at vera fysioterapeut.

Vit hava leingi ynskt at sett meir inn á hesum økinum, og gleðast tí sjálvsagt um at fáa Katrin í toymi rundanum Betri liðið, skrivar Víkingur.

Felagið hevur eisini kunngjørt fyrsta styrkin til leikarahópin. 22-ára gamla Eyðgerð Rúnadóttir Mikkelsen spældi ikki í 2023, men toftakvinnan hevur seinastu árini gjørt vart við seg hjá sum málverji hjá millum annað NSÍ og HB. Eisini hevur Eyðgerð spælt 22 U-landsdystir og tveir A-landsdystir.

Hanna og nýggi málverjjin, Eyðgerð Mikkelsen (Mynd: Víkingur)