- Eg fann telefonbókina fram og ringdi til Richard Møller Nielsen

Abraham Løkin er eitt av stóru nøvnunum í føroyskum fótbólti, og fríggjadagin var hann gestur hjá Trygva Absalonsen í Fótbóltsskylinum á FM1.

Tosað varð millum annað um yrkisleiðina hjá Abraham sum fótbóltsleikari. Eitt var m.a. um tíðina í Odense, har fótbóltur als ikki var partur av ætlanini, tá Abraham flutti niður í lestrarørindir. Men skjótt hevði miðvallarin sjálvur ringt til Richard Møller Nielsen, sála, sum tá var venjari hjá OB.

Hann hevur eisini verið í Fraklandi eitt skifti.

Ábraham er uppvaksin í Fuglafirði og var eisini við til at vinna higartil einasta FM heitið hjá besta mansliðnum hjá ÍF í 1979.

Ábraham var eisini - sum flestu vita - ein týðandi partur av hópinum sum vann á Eysturríki í Landskrona 12. september í 1990. Nakað, sum nógv ikki vita, er. at Ábraham var næstsíðstur á bóltinum, tá Torkil Nielsen legði Føroyar á odda 1-0. Hetta kom ikki á upptøkurnar, tí endurtøka av stórum møguleika til Eysturríki varð vístur, tá uppleggið til søguliga málið kom.

- Tað var eg, sum snittaði bóltin viðari til Torkil Nielsen í Landskrona, staðfesti Abraham Løkin, sum fyrr hevði eftirnavnið Hansen.

Abraham Løkin varð kosin besti føroyski spælari í 20. øld. Nakað, sum kenslur hansara eru tvíbýttar um.

- At vera kosin til besti føroyski leikari í 20. øld er heldur órættvíst fyri hinar, heldur 67-ára gamli fuglfirðingurin í Runavík, sum hevur verið virkin sum venjari leingi.

Hugt varð eisini eftir Meistaradeildini hjá monnum og støðuni har, nú byrjað verður aftur eftir landsliðssteðgin.

Hoyr alla sendingina her