Allan og Bjarni endaðu við silvurheiðursmerkjum

Eins og í finalu nummar tvey, var munurin bert eitt mál, tá Fram og Valur í gjárkvøldið brustu saman á Hlíðarenda í Reykjavík.

Tað endaði 27-28, og harvið endaði kappingarárið hjá Vali við vónbroti.

Tað er best av fimm - ella fyrst upp í trý - í íslendsku finalunum. Fram kom upp á trý í gjár.

Bjarni í Selvindi og Allan Norðberg hava stríðst fyri tíð, men uppruna StÍF'arnir endaðu við silvurheiðursmerkjum. 

Júst Bjarni javnaði til 27-27 í seinasta minutti við sínum triðja máli, men Fram svaraði aftur.

Liðið hjá Einari Jónsson vann eisini steypafinaluna - hetta móti Jóannesi Bjørgvin og Stjarnuni. Fram, við fyrrverandi H71-venjaranum, er harvið greipuvinnari.

Einar Jónsson í tíðini sum H71-venjari (Savnsmynd: Sverri Egholm) 

Kvinnurnar hjá Vali, við Silju Arngrímsdóttir Müller, kunnu framvegis gerast íslandsmeistarar. Tær vunnu fyrsta finaludystin móti Haukum týskvøldið og spæla á Hafnafjørðinum klokkan 20.30 í kvøld.