André Olsen í HB restina av árinum

Venjaraspurningurin í HB er nú avgreiddur. HB og André Olsen hava skrivað undir sáttmála galdandi restina av árinum.

Harvið er greitt, at fyribils venjaratoymið, sum tók yvir eftir at italiumaðurin Adolfo Sormani legði frá sær fyrst í hesum mánaðinum, heldur fram.

Afturat sær hevur André Olsen Teit Matras Gestsson og Trónd Jensen sum hjálparvenjarar, Jens Martin Knudsen sum málmansvenjara og Áka Johansen sum greinara.

Tað hevur higartil gingið væl hjá André Olsen og toymi hansara. Á útivølli vunnu teir 1-0 móti Víkingi og á heimavølli megnaðu teir 1-1 móti KÍ.

Í morgin verður HB á vitjan við Løkin í Runavík móti NSÍ.