Dan Brimsvík heldur fram restina av 2025

2. september varð kunngjørt, at Morten Karlsen var uppsagdur í Lyngby, og at eitt fyribils venjaratoymi skuldi taka yvir.

Hesum var Dan Brimsvík partur av. 38-ára gamli havnarmaðurin varð í summar settur sum "Head of Coaching" í sælendska felagnum. Seinasta stóra mánaðin hevur Dan eisini verið knýttur at besta liðnum.

Hesa tíðina hevur Lyngby fingið 10 stig í fýra dystum í næstbestu donsku deildini. Góða spælið og ósigraða gongdin hevur gjørt, at Lyngby í løtuni liggur á 2. plássi og til uppflyting til Superliguna. Bert Hillerød, við Adrian Justinussen og Poul Kallsberg á liðnum, er frammanfyri liðið hjá Dan Brimsvík.

Sí eisini: Adrian avgjørdi móti Middelfart - Meinhard skoraði í sigri á Esbjerg

Gongdin hevur eisini leitt til gleði í og kring Lyngby, og á lyngby-boldklub.dk í dag verður staðfest, at menningin seinasta stóra mánaðin hevur gjørt, at Lyngby hevur valt at bíða við at seta ein nýggjan høvuðsvenjara.

Í Lyngby vilja teir vera við, at "stórur áhugi er fyri starvinum", og at "man hevði kunna sett ein nýggjan venjara í morgin". Tó skal tað vera tann rætti, og man heldur, at tað rætta beint nú er at halda fram við sama toymi restina av 2025. Seks dystir eru eftir av hesari hálvuni í næstbestu donsku deildini.

Yviskipað standa Dan Brimsvík og Andreas Bjelland á odda fyri liðnum. Føroyingurin hevur milum annað venjararoyndirnar og neyðugu útbúgvingina, meðan Bjelland hevur spælt leingi á hægsta stigi í Danmark og aðrastaðni. Báðir kenna felagið - tað er Andreas Bjelland, sum hevur tikið sær av miðlauppgávunum hetta tíðarskeiðið, og Lyngby ætlar, at hann skal halda fram í framtíðarvenjaratoyminum. 

Hóast góðu gongdina bendir einki á, at Dan Brimsvík fast verður fluttir upp til besta liðið, tí hann er settur at stýra sterka akademi'inum saman við akademistjóranum.