Eftir bólkaspælið: Óli flest málstig og upplegg í EM - Pauli flestar bjargingar

Heldur enn at vera í Malmö og fyrireikað seg til fyrsta dystin í meginumfarinum, eru føroyingar farnir heim. Teir flestu av spælarunum ferðaust í gjár til Føroyar at taka sær av løttum í nakrar dagar, áðrenn lívið í feløgunum heldur fram.

Trý stig og +10 í málúrttøku í bólkaspælinum rakk ikki til víðari luttøku. Tað gav eitt 13. pláss: Tólv lið eru farin víðari til miðumfarið, sum nú er í gongd.

Sí eisini: Nú byrjar EM-meginumfarið

Eftir bólkaspælið ber til at gera ymiskt upp - millum annað tøl. Og her sæst, at fleiri føroyingar veruliga hava gjørt vart við seg. (Yvirlit niðast)

Serliga er tað flott, at 20-ára gamli Óli Mittún er ovast á tveimum "stórum álopslistum": Flest uppleggum og málstigum (mál+upplegg). Nummar 78 brendi bert trý skot í trimum dystum, og um brotskøst verða tikin burtur, er tað bert Mathias Gidsel, sum hevur fleiri mál enn Óli í EM.

Tað var torført hjá mótstøðuliðunum at steðga Óla Mittún lógliga í Oslo (Mynd: Sverri Egholm)

Sí eisini: Tveir dagar leikbann fyri at sláa Óla Mittún

Vandamikli føroyski er í dag tilnevndur til heimsins besta unga spælara. Tað var systkinabarnið Elias Ellefsen á Skipagøtu eisini fyri tveimum árum síðani, og hann vann heiðurin.

Kiel-spælskiparin var skaðadarvaður áðrenn hetta HM-endaspælið, men eftir bólkaspælið er nummar 71 í topp-fimm á fleiri topplistum: Millum annað hevði Elias flest alveringar av øllum fyrstu fimm dystirnar. Og so at siga allar vóru rættar.

Føroyar fingu 108 skot á mál móti sær, og Pauli Jacobsen fekk fatur á yvir 31 prosent av teimum. Eitt samanlagt rímiliga gott tal hjá dagsins manni móti Montenegro, sum saman við norska Torbjørn Bergerud hevði flest bjargingar í bólkaspælinum.

Elias á Skipagøtu og hinir føroyingarnir vórðu kroystir kropsliga móti Slovenia, men serliga numma 71 tók stóra ábyrgd 

Liðformaðurin Pauli Jacobsen stórliga fagnaður av fjepparunum nakað eftir seinasta dystin (Myndir Sverri Egholm)

Føroysku spælararnir stórliga fagnaði í Fornebu

Yvirlit hjá EHF sæst her - niðanfyri sæst yvirlit við hvar føroyingar eru á EM-listunum, eftir at øll hava spælt tríggjar dystir:

Toppskjúttar:
4. Elias Ellefsen á Skipagøtu: 27 mál. 
- hetta uppá 36 skot (Tað svarar til 75 prosent, sum er hægri enn hjá øllum øðrum í topp-7)

Brotskastsmál: 
1. Elias Ellefsen á Skipagøtu: 12 mál
- hetta uppá 14 brotskøst (Tað svarar til 85,7 prosent) - Fýra aðrir skoraðu 12 brotskøst 

Mál uttan brotskøst:
2. Óli Mittún: 23 mál 
- javnur við Simon Pytlick og bert tvey mál aftanfyri Mathias Gidsel - Óli hevur tó væl hægri gagnnýtisprosent (88.5 prosent)

Málstig:
1. Óli Mittún: 47 stig
Hetta er mál+upplegg - Óli er eftir bólkaspælið eitt frammanfyri Kiko Costa, sum hann kappast við heiti sum heimsins besti spælari við. 

Elias Ellefsen á Skipagøtu er á 5. plássi við 40 málstigum (eitt aftanfyri Mathias Gidsel)

Sí eisini: Óli Mittún í uppskoti sum heimsins besti ungi spælari fyri 2025

Upplegg:
1. Óli Mittún: 24 upplegg - átta í miðal fyri hvønn dyst!
- her er føroyski hvirluvindrin langt fremst: Fimm frammanfyri Blaz Janc hjá Slovenia og seks upplegg frammanfyri norsku stjørnuna, Sander Sagosen

Bjargingar:
1. Pauli Jacobsen: 34 bjargingar 
- hetta uppá 108 skot (31,48 prosent). Her er føroyski liðformaðurin javnur við Torbjørn Bergerud. Pauli hevur eisini tvær brotskastsbjargingar: Nummar seks

Alveringar: 
1. Elias Ellefsen á Skipagøtu: 615 
- heili 99.7 prosent av hesum funnu vegin fram! Hetta er hægst av øllum í topp-tíggju

Dagført: 15.47