Hans Jákup Arngrímsson fær sín evropeiska elddóp á Tórsvølli í kvøld

Víkingur hevur allarflestu spælararnar til reiðar til evropeisku uppgerðina móti Linfield. 

Tó er Olaf Bárðarson ikki tøkur til hesar báðar dystirnar. Beinleiðis reyða kortið, sum vongurin fekk, í fyrra Champions League-dystinum móti Lincoln Red Imps hevði tríggjar daga-leikbann við sær. Olaf spældi ikki á Gibraltar. Hann er tøkur aftur í Evropa, um Víkingur kemur víðari til play-off; ella aftur í 2026.

Olaf Bárðarson útvístur síðst í dystinum í Klaksvík - hetta fyri at spýta (Mynd: Sverri Egholm)

Nýggjur maður millum stengurnar

Størsta broytingin hjá Víkingi í kvøld verður í málinum.

Portalurin hevur fingið upplýst, at Bárður á Reynatrøð ikki er tøkur. Talan er um persónligar orsøkir.

Hans Jákup Arngrímsson hevur verið eykamálverji hjá A-landsliðsmálverjanum seinastu árini. 21-ára gamli gøtumaðurin hevur bert spælt ein dyst á besta liði barndómsfelagsins: Tað var móti FC Hoyvík í steypakappingini í fjør.

Hann hevur tó, sambært FaroeSoccer, nærum 100 dystir í 1. deild, og í juni spældi Hans Jákup Arngrímsson sín fyrsta U21-landsdyst. 

Har gjørdi Víkingurin tað sum hann skuldi í føroyska sigrinum á Estlandi. Nú kemur evropeiski elddópurin hjá Hans Jákupi.

Hans Jákup Arngrímsson og yngri beiggin Ingi spældu báðir fyrsta U21-landsdystin, tá Føroyar vunnu 2-1 á Estlandi í Klaksvík í juni (Mynd: Agnar Prestá)

Les og hoyr meira um hetta: Brøður spældu sín fyrsta U21-landsdyst saman

Víkingur og Linfield spæla fyrra dystin í 3. umfari í Conference League í kvøld klokkan 19 á Tórsvølli.

Sí eisini: Linfield hevur tak á føroyskum feløgum

Les eisini: Kann verða seinasti evropeiski heimadystur hjá Atla Gregersen

UEFA Europa Conference League 3. umfar - fyrri dysturin
Í dag, hósdagin 7. august á Tórsvølli
19.00: Víkingur - Linfield (NLR)

Til ber at keypa atgongumerki her

Portalurin verður á staðnum við millum annað beinleiðis bloggi. FM1 sigur frá dystinum
Kringvarpið stroymir dystin