KÍ sendir krans til Serbia og sýnir samkenslu

Sum vit skrivaðu í gjár, so er Radnicki 1923 og serbiskur fótbóltur sum heild í sorg. Ein skelkur rakti undir landskappingardysti mánakvøldið, tá Mladen Zizovic small.

Á veg á sjúkrahús gjørdist greitt, at lívið hjá venjaranum, sum bert varð 44-ára gamal, ikki stóð at bjarga. Dysturin varð tá avblástur. 

Hendan syrgiliga søgan hevur verið nógv frammi í vikuni. Tað hevur eisini fingið fótbóltsfelagið í Klaksvík at senda krans og sína samkenslu til Serbia.

Mladen Zizovic hevði bert verið venjari í felagnum í tíggju dagar. Men hetta var felag, sum vitjaði í Føroyum í summar. KÍ og Radnicki 1923 spældi tveir tættar dystir í 2. umfari í Conference League í juli. Har endaði KÍ við at verða omaná eftir 1-0 sigur í Klaksvík.

KÍ - Radnicki endaði 1-0. Tá fór táverandi venjari felagsins frá (Mynd: Sverri Egholm)

Mladen Zizovic var annars venjari hjá Borac Banja Luka, tá bosniska felagið sendi júst KÍ út í 3. umfari í Europa League í 2024. Zizovic var úr Bosnia - hann var eisini venjari hjá Jóan Símuni Edmundsson fyrstu tveir mánaðirnar, sum toftamaðurin var í norðurmakedónsa Shkupi.

KÍ skrivar soleiðis á Facebook-síðu sínari:

Venjarin á serbiska liðnum Radniki, sum KÍ spældi ímóti í summar, er deyður, bert 44 ára gamal.

Mladen Zizović fekk ein hjartatilburð undir einum dysti, og hóast skjóta og góða hjálp stóð lív hansara ikki til at bjarga

KÍ vil við hesum sýna djúpa samkenslu við familju hansara, vinfólkum, starvsfeløgum, spælarum og felagnum

Vit eru takksom fyri at eiga serbiska familju í okkara felag, sum hjálpti okkum at senda blómur. Hjartaliga takk til foreldrini hjá okkara Deni, Zoran Pavlovic and Gordana Radojevic.

Serbin Deni Pavlovic hevur verið í KÍ síðani 2018. Her saman við foreldrunum Zoran Pavlovic og Gordana Radojevic undan dystinum í Serbia. Tey hava hjálpt KÍ við hesum (Mynd: Klaksvíkar Ítróttarfelag)

Almennu boðini til Radnicki, sum eru á enskum, síggjast eisini á Klaksvíkar Ítróttafelag