Liðið hjá Jóan Símuni skelkaði í Silkeborg

Silkeborg var stórfavorittur og legði seg eisini á odda stutt fyri steðgin í heimadystinum móti KA Akureyri í 2. umfari í Conference League.

Útiliðið helt tó á at stríðast, og í yvirtíðini fekk KA eisini løn fyri tað: Frísparksinnlegg og so smekkaði áleyparin Hallgrimur Steingrimsson bóltin í netið.

1-1 og ein skelkur fyri Silkeborg, danskan fótbólt og Evropa.

Sunnudagin tapti Silkeborg fyri Brøndby, sum hóskvøldið vitjar HB og Tórsvølli. Hetta var í 1. umfari í Superliguni, so kappingarárið hjá Kent Nielsen og hansara monnum er ikki byrjað væl.

Við úrslitinum í fyrra dystinum í kvøld er alt opið, í mun til hvør kemur víðari til 3. umfar í kappingini.

Seinni dysturin verður spældur á Akureyri hóskvøldið 31. juli.

Jóan Símun sat uttanfyri vegna "gamalt" leikbann

Til seinna dystin fær Jóan Símun Edmundsson helst ein leiklut. 

Tað væntaðu vit eisini, at hann fór at fáa í kvøld, men tað sum vit ikki gáaðu um var, at toftamaðurin hevði eitt evropeiskt leikbann á sær.

Hetta fekk Jóan Símun í somu kapping og fyri sama felag: Føroyingurin spældi eisini fyri KA í seinnu hálvu í 2023 og spældi millum annað fýra evropeiskar dystir.

i (Mynd: Knattspyrnufélag Akureyrar)

Hann skeyt eitt mál men í tí seinasta dystinum - úti móti Club Brügge - varð Jóan Símun Edmundsson rikin av vølli eftir tvey gul kort seint í dystinum.

Hann hevur ikki verið tilknýttur til lið, sum hevur havt evropeiskan dyst síðani. Nú er leikbannið av, 34-ára gamli føroyingurin við 95 landsdystum kann spæla í næstu viku. Hetta kann gerast ein stórur dystur hjá KA.