Málleyst í føroyingauppgerð í Kolding - Martin og teir settu AaB uppá pláss

Fýra føroyskir landsliðsspælarar, sum í næstu viku vera savnaðir í Føroyum og síðani á Gibraltar, vóru í eldinum í næstbestu donsku deildini. Hetta var í tveimum av fyrstu dystunum í 8. umfari.

Aarhus Fremad - AaB 5-1
Martin Agnarsson (AF), 90 minuttir og trý stig

Í fyrra hálvleiki vísti Århus Fremad til tíðir frálíkt fótbóltsspæl og eisini stóra kynismu: Fýra skot á mál og fýra mál. 

Øll málini í dystinum síggjast her

Martin Agnarsson átti sín lut í 1-0 málinum, tí við góðum túri í vinstru vann 22-ára gamli havnarmaðurin hornaspark, tá hann royndi at leggja innfyri. 

Aarhus Fremad setti av álvara AaB uppá pláss í góðveðrinum á Riisvangen. Liðið hjá Martini er annars uppflytari, meðan AaB er niðurflytari úr Superliguni.

Tað varð 5-0, áðrenn AaB pyntaði móti endanum. Hetta noyðist føroyski vinstri bakkurin at taka á seg. Hann varð lagdur undir trýst í uppbyggingsspælinum, tók stóran vága við bóltinum og misti hann á vandamiklm stað. Síðani var Martin Agnarsson ein av teimum, sum ikki megnaði at blokera.

Hetta merkti tíbetur einki fyri útfallið, og annars spældi orkuríki føroyski bakkurin ein góðan dyst. Talan var um eitt flott avrik hjá teimum í gulum og svørtum og ein týðandi sigur hjá Aarhus Fremad, sum nú hevur vunnið seg nøkur pláss niðurflytingarstrikuni.

Kolding IF - Hillerød Fodbold 0-0
Meinhard Egilsson Olsen (Kolding) og Adrian Rúnason Justinussen (Hillerød) 90 minuttir og eitt stig hvør
Poul Kallsberg (Hillerød) 61 minuttir

Talan var um ein dyst, sum varð nógv merktur av bæði tí taktiska men eisini inntensiteti og nærdystum. Hetta vóru eisini nummar tvey og trý í deildini, sum stríddust um virðismikil stig.

Stórir málmøguleikar vóru eisini, og Adrian Justinussen var vandamiklast hjá Hillerød fyri steðgin. Fyrst hevði føroyski vongurin eitt gott langskot, og stutt fyri steðgin varð hann spældur púra leysur. Í báðum førum var Kolding-málverjin tó væl fyri; serliga uppá seinna møguleikan hjá Adrian.

Í yvirtíðini var Kolding ógvuliga nær við at avgera dystin, men í trimum førum vildi bólturin ikki í málið, og tað endaði við, at Adrian Justinussen ruddaði væl. Hann og Meinhard Egilsson Olsen spældu báðir 90 minuttir - Meinhard hevði millum annað gott tamarhald á Poul Kallsberg tann tíman, sum strandingurin spældi, og var sjálvur ein hóttan frameftir. 

Støðan í Betina Liga:

Føroyingafeløgini liggja í løtuni væl fyri í Betina Liga - nú verður landsliðssteðgur (Skíggjamynd: 1-division.dk)

Dagført: 20.36