Agnar Prestá
Tað hevur gingist væl hjá Mikkjali Thomassen og AIK í Allsvenskan í ár, men størsti trupulleikin í oddastríðnum er Mjällby AIF.
Felagið hevur ikki vunnið nógv í søguni men vann svensku steypakappingini í 2023. Í ár stríðist liðið um svenska meistaraheitið og er á odda - nú rímiliga langt á odda.
Mjällby vann oddadystin móti AIK í dag 2-0. Bæði málini komu eftir steðgin.
Spælt var í lítla býnum Hällevik í Blekine-økinum. Mjällby hevur eftir 17 av teimum 30 umførunum í Allsvenskan 40 stig. Hammarby og AIK eru ávikavist sjey og átta stig aftanfyri.
Tungt tap hjá Mikkjal Thomassen og liði hansara, ið tó hevur tíð enn.
Nú skal í høvuðsstaðarfelagnum hugsavna seg um evropeiska uppgávuna. Farið verður til Estlands í vikuni: Paide Linnameskond, sum B36 sló út í 2023, tekur ímóti hóskvøldið. Talan er um fyrra dystin í 2. umfari í Conference League, har KÍ og HB eisini eru við.
Vinarliga broyt tínar kennifíla - og privatlívsstillingar fyri at síggja hetta innihald