Noreg endaði landsliðsskeiðið hjá Neymar - aftur harmljóð úr Brasil

Meðan tað er ovfarakæti útyvir tað vanliga í Noreg, er tað fótbóltssorg í Brasil.

Myndir: 100.000 fólk í fótbóltsveitslu í Oslo

"Seleção", sum brasilska landsliðið verður rópt í heimlandinum, fyllir ógvuliga nógv í stóra suðuramerikanska landinum - serliga tá tað er HM-endaspæl. Brasil er altíð við, og eingin hevur vunnið størstu kappingina fyri landslið eins ofta (5).

Men síðani seinasta gullið, í 2002, er tað endað við stórum vónbroti hvørjaferð. Brasil hevur ikki verið í finaluni í 24 ár og bert einaferð í hálvfinaluni seinastu seks HM-endaspølini. Tað var á heimavølli í 2014, men tað gekst einki serligt: Týskland vann 7-1 á Maracana.

Hetta var fyrsta endaspælið hjá Neymar da Silva Santos Júnior. Kviki, snildi og tekniskt ógvuliga gávaði spælarin er uppvaksin í Santos, eins og Pelé, og skjótt gjørdist blómandi brasilianarin tann stóra nýggja vónin. Hann fór til Barcelona, yvirtók 10-talið á landsliðnum, men hóast 80 mál í 130 landsdystum og 9 í 15 HM-dystum so endaði tað - nakað eins og við yrkisleiðini í feløgunum: 

Tað gjørdist ongantíð so gott, sum man hevði væntað og vónað, at tað fór, og alt endaði við tárum og brasilskum vónbroti í New Jersey í gjár.

Neymar snýtti Nyland úr ellivu metrum. Men tað endaði 2-1 til Noreg - og Brasil er úti aftur tíðliga (Mynd: Charly Triballeau/AFP/Ritzau Scanpix)

Tað var nakað av fjasi við bóltinum áðrenn og aftaná - og Neymar fekk eisini eitt gult kort í yvirtíðini (Mynd: Timothy A. Clary/AFP/Ritzau Scanpix)

Eftir dystin var brasilianski 10'arin á knøunum og hevði nógv tár eftir landsdyst nummar 130 - tann seinasti. Hann spældi eisini sín fyrsta dyst  (Mynd: Mike Segar/Reuters/Ritzau Scanpix)

Soleiðis hevur hvørt endaspæl hjá Neymar eisini endað. Hann var skaddur, tá Brasil vann Copa America í 2019 - tað einasta steypið sigursvanda landið hevur vunnið í tíðini hjá Neymar á landsliðnum.

Tað gekk frægast í HM-endaspælinum á heimavølli í 2014, tá 10'arin eisini av álvara sprutlaði í fleiri dystin, men ein ryggskaði í fjórðingsfinaluni móti Kolumbia elvdi nærum til landasorg í Brasil. Ein sum bert varð størri í sjálvari hálvfinaluni, sum Neymar noyddist at hyggja at.

Bæði í Russlandi í 2018 og í Katar í 2022 fór Brasil út í fjórðingsfinalu móti evropeiskum londum - ávikavist Belgia og Kroatia - og so skjótt "Seleção" rendi seg inn í evropeiska mótsstøðu í røkkstøkkdysti í USA, gekk ikki meira: Sjálvt ikki Carlo Ancelotti fekk vent keðiligur gongdini.

Eitt var at Brasil fór út móti Noreg. Men lutfalsliga lítla landið í Skandinavia hevði bóltin væl meira og spældi tað meira "brasilianskt". Tað er sum um, at tað í løtum bert er eyðkendi liturin á brasilanska búnum er eftir av tí "gamla Brasil", tá liðið spælir. Atfinningarnar heima eru øðiligar - frá miðlum og gomlum spælarum. Jogo Bonito er saknað, og Brasil bergtekur sjálvdan longur í HM-endaspølum. Nú rakk tað ikki eingongd longur enn 1/8-finalurnar.

Neymar er nú 34-ára gamal, spælir heima í Brasil og var skaddur upp til endaspælið. Hann kom inn til nakrar minuttir í røkkstøkkdystunum. Tað er ringt at hesaferð peika fingurin á hann í ov stóran mun, men tíðin hjá 10'aranum, ið var so stórliga fagnaður sum yngri og sum enn er høgt í metum hjá nógvum í Brasil, á brasilianska landsliðnum er ein ímynd av niðurfongdini. Ein tíð sum byrjaði í venjingardysti móti USA í New Jersey í juli 2010 og sum endaði sunnukvøldið 5. juni á júst sama leikvølli.

Neymar staðfesti eftir ósigurin á Noreg í gjár, at hann hevur spælt sín seinasta landsdyst (Mynd: Angela Weiss/AFP/Ritzau Scanpix)