Nýggjur dráttur til kappróðurin í Klaksvík

Í síðsta mánaða varð nýggja og snotiliga kappróðrarneystið í Klaksvík, sum er skamt frá har tað gamla var, tikið í nýtslu.

Sí eisini: Myndir: Heimsins flottasta kappróðrarneyst tikið í nýtslu

Talan var um eina stóra verkætlan fyri Klaksvíkar kommunu og Kanjon, men hóast móttøka og annað hevur verið, er arbeiðið ikki heilt liðugt enn.

Klaksvíkar kommuna skrivar á heimasíðu sínari, at í hesum døgum verður nýggjur dráttur gjørdur við nýggja róðrarneystið hjá Klaksvíkar Róðrarfelagi.

(Myndir: klaksvik.fo)

Mongu rógvararnir í felagnum njóta í løtuni gott av nýggju og góðu umstøðunum, men tað er umráðandi, at ein dráttur stendur til reiðar, tá bátarnir verða flotaðir í vár. Hetta er tað, sum arbeitt verður við nú.

Klaksvíkar kommuna skrivar, at umframt bátadrátt veður uttanumøkið kring kappróðrarneystið gjørt liðugt. Somuleiðis eru útigólv og bryggjukantur eisini við í verkætlanini. Býráðið hevur sett 3 milliónir krónur av til arbeiðið.