Polterabend: Fegnaðist um gullið hjá komandi manninum

Bæði í 2023 og 2024 vunnu Sara Samson Lamhauge og NSÍ-kvinnurnar steypafinaluna. Tá var unnustin og hennara trúlovaði René Shaki Joensen millum stuðlarnar á Tórsvølli - í kvøld var tað umvent.

Tað serstaka hesaferð var, at vinkonurnar høvdu polterabend við Saru í gjár, so tær vóru eyðkendar millum KÍ-áskoðararnar til steypafinaluna.

Sara Samson Lamhauge sæst við krúnu og øðrum mitt í rokanum (Mynd: Jens Kr. Vang) 

Seinastu tvey árini hevur miðvallarin havt stóran leiklut í steypasigurum og gullheiðursmerkjum hjá NSÍ  - her í finaluni móti Víkingi í fjør (Mynd: Sverri Egholm)

Rená Shaki Joensen var aftur stinnur fyri KÍ. Hann hevur spælt fyri felagið seinastu fýra árini (Mynd: Jens Kr. Vang) 

René Shaki Joensen, ið hevur verið nakað skaðadarvaður seinastu mánaðirnar, stóð fyri einum sterkum avriki á KÍ-miðvøllinum í gjár. Orkuríki havnarmaðurin spældi allar 90 minuttir í finalusigrinum á Víkingi og var við til at vinna eina greipu fyri aðru ferð.

Aftaná kundi Shaki fegnast saman við sínum liðfeløgum, fjepparum og eisini Saru Samson Lamhauge. 

Eitt serstakt steypafinalukvøld hjá parinum (Mynd: Jens Kr. Vang)

Myndir: Stóri KÍ-fagnaðurin á Tórsvølli

Kærleikssøgan hjá René Og Saru, sum byrjaði tá bæði spældu við HB, er væl lýst í einari útávu í blaðnum Ellivu frá í fjør - Tað byrjaði við Snapchat.

Har verður eisini komið inn á, hvussu tað er at fáa javnvág í lívið sum fótbóltsspælari á hægsta stigi í Føroyum: Bæði spæla við oddaliðum og eru sum oftast á landsliðnum, tá tey eru tøk. Saman eiga René Shaki Joensen og Sara Samson Lamhuage dóttrina Shiru Shaki Lamhauge.

Í roynd og veru hevði Sara spælt finalu fýra ár á rað áðrenn hetta kappingarárið - við HB í 2021 og 2022. Tá var hon ikki á vinnandi liðnum, men nú er steypagull komið inn í parlagið trý ár á rað. 

Sum heild er nógv gull har: Í fjør vunnu Sara Samson Lamhauge og NSÍ greipuna - nú vóru tað René Shaki Joensen og KÍ. Skjótt skulu tey bæði giftast.