Stórur smeitur: Ísak Vedelsbøl verður ikki tøkur til HM-endaspælið

Ísak Vedelsbøl var ikki við í Montengro síðsta vikuskifti, tí hann fekk ein vøddaskaði undir venjing dagin eftir sigurin móti Kosovo.

Sí eisini: Ísak Veldelsbøl skaddur - Erling Erlendsson við ístaðin

Í fyrstu syftu varð hildið, at Ísak Vedelsbøl fór at vera úti í 6-8 vikur, og at hann burdi verið til reiðar til HM-endaspælið, sum byrjar 13. januar.

Men tað er als eingin møguleiki fyri hesum.

Portalurin hevur í dag fingið upplýst, at skaðin er væl meira álvarsamur, enn fyrst varð hildið.

Ísak Vedelsbøl hevur fingið stóran skaða á eina nerv og í einum lítlum vødda í forlærinum. Talan er um so mikið fløktan og álvarsaman skaða, at neyðugt er við skurðviðgerð.

Dysturin hjá Ísaki Vedelsbøl móti Kosovo í síðstu viku verður eftir øllum at døma seinasti dystur hjá 22-ára gamla strikuspælaranum í longri tíð (Mynd: Sverri Egholm)

22-ára gamli HØJ-spælarin skal undir skurð næsta hósdag, og síðani bíðar drúgv tíð uttanfyri við endurvenjing og øðrum.

Vit hava fingið upplýst, at roknast nú kann við 4-6 mánaðum.

Harvið verður Ísak Vedelsbøl ikki bert úti, meðan HM er. Strikuspælarin verður ikki við til týðandi EM-undandystirnar móti Ungarn í mars, og hann er ivasamur til seinastu undandystirnar, sum eru á skránni í mai - og harvið restina av kappingarárinum í Damnark.

Talan er sjálvandi um ein stóran smeit fyri Føroyar og Ísak Vedelsbøl sjálvan.