U19-kvinnurnar sigraðu móti Kypros

Eisini í øðrum dystunum í EM-undankappingarbólki B2 í Moldova, vunnu føroysku U19-genturnar og hildu málið reint.

Týsdagin gekk tað útyvir vertirnar Moldova, og í dag vunnu Føroyar á Kýpros. Tað varð ikki 7-0 hesaferð, men 2-0 sigurin tryggjar, at Føroyar eru á 1. plássi í bólkinum undan seinasta umfarinum.

Sí eisini: Video: Mongu føroysku málini í Moldova

Brá Zakariasardóttir og Eydna Dalheim Olsen skoraðu málini eftir ávikavist 10 og 55 minuttir. Hagtølini hjá UEFA vísa, at hetta var ein dystur, har Føroyar vóru væl omaná.

Brá Zakariasardóttir úr Fortuna Hjørring (fyrr FC Hoyvík og B36) samanv við Eydnu Dalheim Olsen úr Víkingi (Mynd: FSF)

Byrjanaruppstillingin hjá Føroyum í dag - sí meira HER

Mánadagin verður bólkafinala móti Estlandi, sum eisini hevur vunnið á Kýpros og Moldova - tó samanlagt ikki so sannførandi sum Føroyar. Hetta merkir, at eitt stig er nóg mikið hjá føroysku U19-gentunum at vinna undankappingarbólkin.

Tað merkir tó ikki, at eitt EM-pláss er í hús. Her er talan um ein av B-bólkunum í undankappingini. Har snýr tað seg um at vinna seg upp í A-bólkinum fyri síðani at spæla móti størri fótbóltstjóðum um endaspælspláss. Fyri at tað skal eydnast, skulu Føroyar vinna bólkin ella vera ein av bestu tvey'arunum.

Harvið hevur U19-liðið góð kort á hondini undan seinasta umfarinum, mánadagin 7. apríl. Í gjør eydnaðist U17-gentunum, har fleiri av hesum somu spældu við, at vinna sín bólk í B-undankappingini og lyfta seg upp í A-bólkin. Hetta eru hervið góð tekin fyri føroyskan kvinnufótbólt.