Váttað: Árni skal spæla við Egersunds restina av árinum

- Fyri triðju ferð í ár, kunnu vit aftur kunngerða, at ein av okkara leikrarum tekur feti víðari út í heim at spæla fótbólt.

Hetta kunngjørdi Víkingur á Facebook-síðu sínari í gjárkvøldið - samstundis sum Egersunds IK á sínari heimasíðu sínari skrivar, at "man er ógvuliga vælnøgdur við at tryggja sær eitt av størstu talentunum í føroyskum fótbólti".

Egersunds og Víkingur vísa á, at hóast unga aldurin (19 ár - føddur í 2006) hevur Árni Nóa Atlason longu spælt 78 dystir á besta liðnum hjá Víkingi.

Miðvallarin spældi sín fyrsta dyst har í 2022, og nú hevur Árni fyribils spælt sín seinasta.

Nógvir dystir frá byrjan...(Mynd: Sverri Egholm)

Og FM-vinnari í fjør. Nú verður næsta fetið tikið (Mynd: Jens Kr. Vang)

Sum Portalurin skrivaði tíðliga seinnapartin í gjár, var avtalan millum liðini komin uppá pláss í vikuni.

Í fyrstu leigar liðið á 7. plássi í næstbestu norsku deildini gøtumannin. Men tað er við einari "optión" at keypa - við ætlan um at keypa Árna Nóa Atlason endaliga leysan í vetur. Hetta er í øllum førum triði spælarin, sum Víkingur sendir avstað í 2025: Geza David Turi (Grimsby) og Poul Kallsberg (Hillerød) eru eisini farnir.

Sí eisini: Foreldrini máttu út at ganga túr, meðan eg skeyt brotsspark

U21-landsliðsspælarin fór til Noregs í gjár, hósdagin. Hann skal nú finna seg til rættis í Egersund - møguliga verður Árni longu í hópinum til dystin í Aalesund sunnudagin. Síðani snýr tað seg um U21-landsdystirnar móti Íslandi og Luksemborg. 

Ein annar U21-landsliðsmiðvallari, sum eisini er føddur í 2006, varð í síðstu viku seldur til lið í næstbestu svensku deildini: Mattias Hellisdal.

Les eisini: Mattias Hellsidal er seldur til svenskan fótbólt

Sí eisini: Árni Nóa Atlason skal royna seg í norskum fótbólti