Video: Elias og Kiel vunnu aftur og eru á odda í Bundesliguni

Elias Ellefsen á Skipagøtu hevur eftir fimm umfør næstflest mál av øllum í Bundesliguni: 45, tað vil siga níggju í miðal. 

THW Kiel hevur sum tað einasta liðið í deildini fult stigatal. Úrtøkan er tíggju stig eftir 41-34 sigurin á Leipzig í gjár.

Har var føroyski spælskiparin næstbesti toppskjútti við átta málum og legði hann upp til flest mál - sjey.

Í samandráttinum ovast, sum eisini sæst á Youtube, er tað fyrsta málið eitt kontramál hjá Eliasi Ellefsen á Skipagøtu. Upplegg hjá nummar 71 eru eisini við - tað á 2.40 er ógvulig snilt: "Wunderschön" sum týski viðmerkjarin segði.

THW Kiel spælir heimadyst móti einum av botnliðnum, Minden, hóskvøldið 25. september klokkan 19.