Aron Benjaminsen fer til Skotlands í morgin

- Ja, also eg fari niður mánadagin. Tað fari eg.

Hetta kundi Aron Benjaminsen váttað fyri Brynjari Jacobsen Poulsen (FM1) í samrøðu í Sarpugerði fríggjakvøldið.

Hetta var eftir seinasta heimadystin hjá 18-ára gamla strandinginum fyri Víking, sum keypti hann úr norska Kristiansand.

Nú er sum skilst alt komið uppá pláss millum Víking og Hearts, og Aron Benjaminsen fer av landinum í morgin, mánadagin.

Les eisini: Vænta Aron Benjaminsen fer fyri slakar 900.000 krónur - pappírarbeiði og annað eftir

Spenanndi vongurin staðfesti fyri FM1, at tað er "medical check", læknakanningin, sum skal gerast mánadagin 31. august. Og so eru tað helst seinastu smálutirnir, og endaligu undirskriftirnar, sum skulu uppá pláss.

Eftir hetta kann Aron Benjaminsen gerast Hearts-spælari og fyrsti føroyski spælarin í bestu skotsku deildini, síðani Gunnar Nielsen í 2015 spældi fyri Motherwell.

Seinastu mánaðirnar hevur Aron Benjaminsen av álvara bergtikið í bestu føroysku deildini, har ungi vongurin hevur næstflest málstig. Bert systkinabarnið, Árni Frederiksberg, hevur fleiri (Myndir: Sverri Egholm)

Eftir trý umfør í skotsku Premier League, sum byrjaði fyrr í mánaðinum, er Hearts á 3. plássi. Liðið hevur eisini spælt seg í Conference League-deildarspælið.

Alt bendir á, at skiftið hjá Aroni Benjaminsen verður kunngjørt tíðliga í næstu viku. Flytingarvindeygað í Skotlandi letur aftur hósdagin 3. august.